Kantabria mendilerroa konkistatuko du Itsastarrak-ek
Trintxerpeko Itsastarrak Mendi Taldea eta Herrerako Mendizaleak Arabako mendilerrora joango dira apirilaren 19an. Ondoren, San Asensioko Lecea upategira joango dira, berau bisitatu eta bertan bazkaltzeko.
Emakumeen Egunean Zegama inguruko tontorrak konkistatu ondoren, Trintxerpeko Itsastarrak Mendi Taldea eta Herrerako Mendizaleak Araban kokatuta dauden Kantabria mendilerroko tontorretara joango dira apirilaren 19an (igandea). Irteeraren ondoren, gainera, San Asensioko (Errioxa) Lecea upategira joango dira, berau bisitatu eta bertan bazkaltzeko.
Mendizaleak 06:30ean irtengo dira Trintxerpeko kaitik, eta 06:35ean Garberan, 06:40an Pio XIIn eta 06:50ean Andoainen geldialdiak egingo dituzte, jendea jasotzeko. Bazkideek 90 euro ordaindu beharko dituzte parte hartzeko; bazkide ez direnen prezioa, aldiz, 95 eurokoa izango da. Izen emateak galdetegi bidez egin behar dira.
Mendizaleek bi ibilbide proposatu dituzte: luzea, 12 kilometrokoa eta motza, 7,5ekoa. Bi ibilbideak Pipaonen (Araba) hasi eta bukatuko dira. Ibilbide luzeak lau ordu eta erdi inguruko iraupena izatea aurreikusi dute mendizaleek. Horiek lau gain konkistatzeko aukera izango dute: Vallehermosako Gaztelua (1.256 metro), Peña Roja (1.284 metro), Peña Artesilla (1.333 metro) eta Recilla (1.301 metro). Azken tontor hori egitea, baina, hautazkoa izango da. Bestalde, ibilbide laburrak bi ordu eta erdiko iraupena izango du. Horiek tontor bat igoko dute: Vallehermosako Gaztelua.
Aurrez aipatu bezala, irteerak bukatu ondoren San Asensioko Lecea upategira joango dira mendizaleak. Lehenik eta behin, upategia bisitatuko dute, eta, bukatzeko, bertan bazkalduko dute. Honakoak dastatuko dituzte: foie moussea tostekin, zezina beratua, txanpiñoiak saltsan, gazta eta antxoa entsalada, patatak errioxar erara, txuletatxoak piperrekin, postrea, ogia, ardo ondua, kafea eta likoreak.
