Prebentzioa, arreta eta politika feministak eskatu dituzte indarkeria matxista ezabatzeko
Autodefentsarako deia egin du mugimendu feministak, "gure artean aliantzak sortu, gune seguruak eraiki, eta kolektibotasunetik politika egitera".
Basauriko hilketa matxista salatzeko larunbatean egindako elkarretaratzea.Oreretako Mugimendu Feminista Kalera atera dira berriro. Haserrea, nekea eta amorrua lehen lerroan jarri dituzte. Gizon batek emakumea hil zuen Basaurin (Bizkaia) joan den asteazkenean; indarkeria matxistak Euskal Herrian aurten hil duen bigarren emakumea da, kontaketa ofiziala egiten hasi zirenetik, 2003tik hain zuzen ere, 135 emakume hil dituzte gizonek. Biolentzia bikarioa da indarkeria matxistaren beste aurpegietako bat, eta 2003az geroztik, hamahiru haur hil dituzte gizonek.
Euskal Herriko Emakumeon Mundu Martxak deituta elkarretaratzea egin zuten Euskal Herrian izandako azken hilketa matxista salatzeko. Amorrua eta mina, bi hitz horiek erabili zituen mugimendu feministak, eta eraildako emakumearen, Amaiaren, familiari, lagunei eta gertukoei babesa adierazita, autodefentsarako deia egin zuen, “gure artean aliantzak sortu, gune seguruak eraiki, eta kolektibotasunetik politika egitera”.
Hori horrela interpelazio zuzena mugimendu feministak, erakundeei; argi esan zieten badutela haiek zeregina auzi estruktural honi aurre egin eta ezabatzeko: “Baliabideak beharrezkoak dira horrelako egoerak saihesteko, gertatu aurretik neurriak hartzeko. Erabaki arduratsuak hartu behar dituzue benetako justizia feminista bat izan dezagun. Prebentzioa eta arreta dira emakumeok behar duguna, eta indarkeria matxistarekin bukatzeko politika feministak”. Ahoan bilorik gabe esan zuen, “erailketa baten ondoren esaten diren hitzak ez digute bizitza salbatuko”.
Interpelazio zuzena ere gizonei, “erantzukizuna duzue honetan guztian; egiturazko arazo honen sostengatzaile zarete. Noiz bukatu behar duzue zuen arteko konplizitate eta isiltasunarekin?”.
Egungo sistema “jasanezintzat” jo zuen mugimendu feministak “emakumeontzat”:Sistema zisheteropatriarkal, kapitalista, arrazista kolonial honetan emakumeok emakume izate hutsagatik erailtzen gaituzte, eta indarkeria matxista egunero jasan behar izaten dugu, lantokian, kalean, eta etxean”. Aitortu zuen, erailketak, indarkeria matxistaren aurpegirik lazgarrienak direla; mutur lazgarri horren azpitik, ehunka eta ehunka gehiago, handiago edo txikiago, indarkeri matxistak finean, “egiturazkoa den indarkeria honekin bukatzea urgentea da. Egunero zapaltzen gaituen sistema zisheteropatriarkal, kapitalista, arrazista eta kolonialarekin bukatu behar da”.
Azken mezua, egoera iraultzera deitzeko, “denok aske bizi ahal izateko”.
Hilketa matxista saiakera Berrizen
Azken hilketa matxistatik astebete ere pasa ez denean, bikotekidea labana batekin hiltzen saiatzeagatik 48 urteko gizon bat atxilotu zuen atzo, astelehena, goizean Berrizen (Bizkaia). Emakumea larri eraman zuten Gurutzetako ospitalera.
Erasotzailea, kalean atxilotu zuen Ertzaintzak.
