Ezagutza, erruz, Torrekuan
Bost tailer antolatu ditu TEKS elkarteak Torrekuan hilabete honetan zehar. Hartzaileak, adin ezberdinetakoak dira tailerraren arabera.
Bost tailer antolatu ditu TEKS elkarteak Torrekuan hilabete honetan zehar. Hartzaileak, adin ezberdinetakoak dira tailerraren arabera. Hilaren 14an izango da lehena, hilabeteko bigarren astearteetan egiten den Teknologia denontzat tailerra, eta Talaios kooperatibako langileek eguneroko teknologiak modu seguruan eta pribatuan erabiltzen irakatsiko diete bertaratzen direnei 17:00etatik 19:00etara.
Hurrengo egunean, hilaren 15ean, lehen aldiz ardoarekin lotutako Wikimedia edukiak aztertu eta landuko dituzte modu komunitarioan: “Unea probestuko dugu Biba Ardoak kooperatiboko ardoen dastaketa egiteko ere”. 18:00etatik 20:00etara izango da tailerra.
Hilaren 16ean, ostatatze tailerrari jarraipena emango diote TEKSekoek 17:30etik 19:30era. Auto ostatatze tailer hori (Selfhosting) Talaios Kooperatibak antolatuko du. Parte hartzen dutenek, internet propioa sortzeko aukera izango dute, Torrekua komunitateko babesarekin. Edozein informatika maila duen pertsonentzako dago bideratua, Nextcloud, Moodle, Pasahitz kudeatzaileak, argazki artxibategi propioa… tresna ezberdinak online jarri eta mantendu nahi duen orori zuzendua.
Hilaren 28an berriz, kalera aterako dute teknologia, Hobetu zure kalea! Openstreetmap eta bestelako tresnekin tailerrarekin, “Orereta-Errenteria herriko kaleetan deskribapen zein mapeatze ohitura egokiak ikasten eta lantzen arituko gara. Ikasitakoa, beste herrietara aplikatu ahalko da, hori du helburu nagusi. Mapa tresna hegemonikoak deseraikitzea, mapa tresna burujabeetan gure herriak eraikiz”. Torrekua eraikin sarreran egin dute hitzordua 17:30ean eta bi orduko iraupena izango du.
Bukatzeko, hilaren 30ean, Bideojoko (mod) garapen tailerra antolatu dute Talaios Kooperatibaren eskutik 17:30etik 19:30era . Software librea erabilita bideojokoen garapenean murgilduko dira. Luanti joko librea oinarri hartuta euren mod-ak garatuko dituzte eta online mundu bat jarriko dute martxan; Godot-ekin ere arituko dira.
Ekitaldi guztiak doakoak izango dira eta euskararen erabilera lehenetsiko den arren, edozein pertsonak parte hartu dezakeela gaineratu dute antolatzaileek.
Informazioa jaso eta izena emateko, online egin behar da. Klik egin hemen.
