Bateletan, bi urre San Juanentzat Euskadiko Txapelketan
Sestaoko lehian beste lau domina lortu dituzte arrosek. Hibaikak bi domina irabazi ditu, eta San Pedrok bat.
Emakumeen Senior Mailako podiuma, San Juanekin eta Hibaikarekin. Asteburuan jokatu da Sestaon (Bizkaia) Euskadiko Batel Txapelketa. Larunbatean finaletarako sailkapen estropadak izan ziren, eta igandean (atzo) finalak. Emaitza oso onak lortu dituzte Oarsoaldeko ontzi txikiek, San Juanek bereziki: Emakumeen Senior Mailan eta gizonen 23 urtetik azpikoenean urrezko dominak irabazi zituzten arrosek.
San Juanen metal bilketa ez zen bi garaipen horietara mugatu, ordea. Neska kadeteek zilarrezko domina bere egin zuten; eta kadete mutilek nahiz Gazte Mailakoek nahiz 23 urtetik azpiko neskek ere zilarrezkoa irabazi zuten. Beraz, arrosak lehian izan ziren hamar kategorietatik seitan dominak irabazi zituzten.
Hibaikak ere maila txukuna azaldu zuen, bi dominaren jabe egin zelako. Emakumeen Senior Mailan hirugarren izan ziren, baita Emakumeen Gazteen Mailan ere.
San Pedrok lortu zuen domina Gizonen Gazte Mailako arraunlarien lanagatik iritsi zen, zilarrezkoa.
Aurretik zerrendatutakoak baino Oarsoaldeko batel askoz gehiago izan ziren Sestaoko Euskadikoan. A finalez gain, B finalak ere jokatu zituzten. Emaitza guztien zerrenda ikusteko baliatu eskeka hau.
