Gutuna: "Segi herriko sua pizten"
Larunbatean egingo du Piztu Lezoko haren 10. urteurreneko festa. Egun osoko egitaraua antolatu dute atzera begirada egin, non dauden zehaztu, eta aurrera begirako gogoeta egiteko. Hori guztia jai giroan, eta beti bezala, herrira zabalik eta herrian eragiteko. Horren harira, Lezoko Sortuko kideek gutuna bidali dute HITZAra. Jarraian, haiek esandakoa hitzez hitz:
“Piztu Lezoren 10. urteurrena ospatzeko egun handia dugu larunbatean.
2014. urtera atzera eginez, Euskal Herria ziklo politiko berri batean murgilduta zegoen, eta aro aldaketa hura ilusioz bizi genuen, urte bereziak izan ziren gurean.
Testuinguru horretan belaunaldi berri batek gazteen asanblada jarri zenuten martxan berriz ere Lezon.
Aldaketa eta bide berriei zegozkien urratsak jarraituz, herriko gazteen beharren inguruko hausnarketa egin zenuten, feminismoa, euskara, naziotasuna, elkartasuna eta elkar zaintza gazteen artean aktibatuz. Barruan zenuten indarra, konpromisoa eta aisialdiarekin uztartu izan duzue.
Hamar urte hauetan inozokeria eta hipokrisiaren kontrako antidotoa zabaldu duzue herriko gazteen artean, adin ezberdineko gazteen komunitate ederra sortuz. Miresgarria guztiz herriko belaunaldi eta eragile ezberdinekin lan egiteko eta sareak sortzeko duzuen gaitasuna. Zuengana erraz hurbildu gaitezke konturen bat edo beste aipatzera, harreman errazekoak zarete eta.
Lezoko Sortutik gure zorionik beroena eta esker ona adierazi nahi dizuegu urte luze hauetan lanean aritu zareten Piztu Lezoko kide guztiei.
Etorkizuna ere oparoa izango delakoan, urte askoan”.
Asier Irastorza, Asier Zabala eta Iñigo Esnaola. Lezoko Sorturen izenean.
