"Pasaiako gobernu taldearekin haserre"
Iritzi artikulu honen sinatzaileak honakoak dira: Errausketaren aurkako koordinakundea-Donostia Bizirik-Orereta Bizirik-Ekologistak Martxan-Eguzki eta Donibane 76+.
Dokumentu honen sinatzaileok gure haserrea eta salaketa azaldu nahi dugu Pasaiako Udaleko gobernu taldeak Donostia Bizirik eragileak joan den igandean egin asmo zuen Hiri hondakinen gaikako bilketa sentsibilizazio kanpaina ekimenari eman dion ezetzagatik.
Eragile horiek joan den urteaz geroztik Gipuzkoako hainbat lekutan kanpaina honekin dihardu inongo arazorik gabe, hala nola Donostiako hainbat auzotan, Andoainen eta Oreretan.
Kanpainak, une eta leku berean, errefusaren edukiontzietan eta edukiontzi berde edo grisetan jasotzen diren hondakinak aztertzean datza, datuak jasoz eta nahastuta botatzen diren hondakinak agerian utziz, herritarrak arazoaz jabe daitezen.
Kanpaina honen helburua argia da: hondakinen gaikako bilketa hobetu behar dugu gaurdanik gerora. Pasaian zehazki ez da hau gertatzen ari, eta egindako azken aldaketarekin, errefusa hirukoiztu da ekainetik abendura 2015ean, atzerapauso nabarmena emanik gaikako bilketan.
Hiri hondakinak berreskuratu behar ditugun oso baliabide garrantzitsuak dira, horrek ekoizpen eta kontsumo moduak aldatzera behartzen gaitu, produktuen berrerabileraren zirkulua itxiz. Errealitate honek beste herrialde batzuetako muturreko egoeratara garamatza baliabideen erauzketa eta ustiapenean.
Honek, hondakinen kudeaketa arduraz birplanteatzera eraman behar gaitu. Premiazkoa da horien bilketa intsentsiboa herri bakoitzean formulatzea.
Gaikako hondakinen tratamendu intentsiboa aipatzen dugunean, kontziente gara gutako bakoitzak sortzen duen hondakinen bilketan modu berri bat planteatzen ari garela, etxeetako zabor birziklagarri guztiak errekuperatzera bideratua. Ohiko bilketa moduak ez dira nahikoak, osagai birziklagarrien zati bat soilik bideratzen baitute, birziklagai izan daitekeen zabor kopurua asko murriztuz.
Hiri hondakinen gaikako bilketa intentsiboa herritar guztientzat ezarri behar da modu orokor batean. Gaikako bilketa honetan hondakin organikoak sartu behar dira —jakien hondakinak gure zaborraren % 40 baitira—, konposta sortzeko (ongarri naturala). Alor honetan aurrera egiteak ikaragarrizko aurrerapausoa suposa lezake gaikako bilketan, egungo %35etik %75-80ra pasatuz.
Gaur egun hau da gure zabor ontzietan errefusa gutxien sortzeko bidea, gure zabortegiek gainezka egin ez dezaten irtenbidea eta etorkizunean errauskailu erraldoirik ez sortzeko bermea, oraindik ere errautsetatik berpizteko prest dirudiena.
