Sentitu, pentsatu, ekin
Esan nahi nizuke dena esango dizudana, desiorik sakonena ala inoiz ez esana. Sekreturik isilena ala berririk onena, desiorik sakonena… gure esku dago dena! Den-dena!
Hilabete batzuk pasatu dira Gure Esku Dago ekinbidea martxan jarri zela. Urtebete ia. Eta hilabete hauetan denetarik ikusi dugu: flashmobak, jaialdiak, argazkiak, ekitaldi koloretsuak… Festa giroa izan da nagusi. Festa eta aldarrikapena, ohi bezala, bide berean.
Eskuetan, bizitza eskuetan, eskuetan daude gure hitzak. Eskuetan, bihotza eskuetan, gure esku dago mundu bizi bat!
Ekitaldiak jendetsuak ari dira izaten. Herritar asko biltzen dira eskubide zibil eta politikoekiko begirunetik abiatuz, demokratikoa eta unibertsala den eskubide batekiko atxikimenduak bilduta: erabakitzeko eskubidearekiko atxikimenduak. Geroz eta gehiago gara nazioa garela eta herri gisa gure etorkizuna erabakitzeko eskubidea dugula uste dugunak; sentitzen dugunak.
Zuk niri «kaixo» esatea, zuk niri «zer moduz lagun?», zu zara nire maitea denok ikasi dezagun! Esan nahi nizuke dena, esango dizudana, desiorik sakonena ala inoiz ez esana, esana!
Eta zein da nire papera kontu honetan? Pentsatuko duzue akaso. Metro bat erosi eta ekainaren 8a agendan koloreztatzeaz gain, badira egin genitzakeen gauza gehiago. Urrats txikienetatik eskuratzen dira lorpen handienak. Sentitzen badugu, pentsatu.
Eskuetan, hizkuntza eskuetan, eskuetan daude hitz guztiak. Eskuetan, bihotza eskuetan, gure esku dago mundu bizi bat!
Gure esku dago hizkuntza ere. Hizkuntza bera baino hizkuntzarekin egin nahi duguna. Bizitzako esparru desberdinetatik ukatzen zaigu gure etorkizunaren jabe izatea. Horrexegatik, hainbat esparrutatik ari gara aldarrikatzen gure etorkizuna erabakitzeko eskubidea. Urratsez urrats, poliki-poliki. Sentituz, pentsatuz.
Herritarrak gara honen muina eta eraikitzera goaz. Izan ere, ohituegiak gaude beste estatuen erasoen kontra egiten. Masterra dugu protestatzen. Eta zer erremedio… Herri erreakzionarioa bihurtu gara. Eraikitzen aritu gara, hala ere; suntsituaz eraiki dugu, zerbaiten kontra eginez egin dugu zerbaiten alde. Baina bada garaia gure bidea egiteko, gainerako sastraka eta bide galduak alde batera utzita.
Eskuetan, bizitza eskuetan, eskuetan daude gure hitzak. Eskuetan, bihotza eskuetan, gure esku dago mundua! Eskuetan!
Eskuetan dugu mundua, gure mundua. Hala sentitzen dugu, hala pentsatzen dugu eta hala egitera goaz. Herri gisa gure etorkizuna erabakitzeko eskubidea dugu.. Sentitzen duguna hausnartu, antolatu eta ekiteko garaia da; sentitu, pentsatu, ekin! Denok elkarrekin!
