Hondakin batzordearen txostena bere egin du EH Bilduk, eta gainontzeko alderdiei gauza bera eskatu die
Datorren agintaldian txipadun bosgarren edukiontzia derrigorrezkoa izatea proposatu du hondakinen batzordeak; birziklatze tasa %60tik gorakoa da helburua
Agerraldia egin du goizean Orereta-Errenteriako EH Bilduk, hondakinen tratamenduaren “aldaketa” eman dela irudikatzeko. Materia organikoa jasotzeko kuboak eskuan zituztela egin dute argazkia, Ingurumen Aholkularitza Batzordearen hondakinen batzordearen proposamena babestuz. Batzordeak derrigorrezko txipdun edukiontzi marroia jartzea deliberatu zuen.
Luis Garridok azaldu duenez, Gipuzkoa hondakinen tratamenduari dagokionez, “eraldaketa sakon batean murgilduta” dago, eta zabortegi eredua “amaitzear” dagoela esan du. Gaineratu duenez, azken legegintzaldian “errauskailua gaindimentsionatua eta behargabekoa” geratu da, “herritarren konpromisoari esker”. Garridok zehaztu du Gipuzkoan %42 birziklatzen dela, eta 2016an birziklatu behar den %60ra iristeko helburua hurbil dagoela.
Bide horretan, Errenteria-Oreretan hondakinen batzordea sortu zela gogorarazi du, “pentsamendu eta ideologia ezberdina duten herritarrez osatuta”. Batzordeak udalari txostena aurkeztu zion, herritarren ekarpenekin. Bertan, 2016rako %60ko birziklatze tasa eta 2018-2020rako %75ekoa proposatu zuten. Xedeak betetzeko, derrigorrezko bosgarren edukiontzia beharrezkoa zela ondorioztatu zuten. Horrekin bat egin du koalizio ezkertiar eta soberanistak, eta datorren agintaldian txosten hori “bide orri” bezala erabiliko dutela iragarri dute.
Pedagogiaren beharra
EH Bilduk ariketa politikoaren printzipioetako bat “pedagogia” dela adierazi du. “Hau da, guretzat nahi ez duguna besteentzako nahi ez izatea”. Horrela, Errenteriako Udalak edukiontzi marroien gastua onartzeko erabakia babestu dute: “San Marko Mankomunitateak hartu izan balu bere gain, gainontzeko herriek gure edukiontziak ordaintzea suposatuko luke. Beste herriek, bilketa sistema berriaren kostua bere gain hartzean, dirua aurreztu eta gastu sozialera bideratu dute”.
PSE-EE, EAJ eta PPk hondakinen gaia “alderdien arteko lehiarako” erabili dutela salatu du Garridok. Argi utzi nahi izan du ez udal gobernu taldeak ezta hondakinen batzordeak ez dutela atez atekoa nahi, nahiz eta hiru alderdi horiek hori aditzera eman nahi izan duten. Horren harira, hondakin batzordearen txostena bere gain hartzeko eskatu diete hiru alderdi horiei, “gure herria %60 baino gehiagoko birziklatze tasara iristen diren udalerrien zerrendara gehitzeko”.
Borondatezko bosgarren edukiontzia ezartzea “aurrerapausoa” dela iritzi dute, eta horren aurrean “aktibo” izango direla jakinarazi du koalizioak. Gainontzeko herritarrak ere birziklatze tasa handitzera gonbidatu dituzte.
Hondakinen batzordearen proposamena bere egin du EH Bilduk
