Hondakinak birziklatzeko "bide luzea" geratzen dela salatu dute

Errauste plantaren aurkako taldeak hondakinen karakterizazioa egin zuen larunbatean, edukiontzi berdeko zortzi poltsa irekita

Erik Gartzia Egaña

Errenteria-Orereta

2015/04/20

Hondakinak banatu eta pisatu zituzten

Errauste plantaren kontrako taldeak —Gipuzkoako Koordinadorak, Donostia Bizirik eta Errenteria-Orereta Bizirik-ek osatzen dute— hondakinen karakterizazioa egin zuten larunbatean, Niessengo atarian. Edukiontzi berdean —errefusarena— zeuden zortzi poltsa zabaldu zituzten, “jende askok oraindik nahikoa birziklatzen ez duela erakusteko”. Gainera, erakundeek hondakinak birziklatzeko “nahikoa baliabide jartzen ez dituztela” nabarmendu zuten. Zabaldutako poltsetako hondakinak sailkatu zituzten, eta datuak “esanguratsuak” direla azaldu dute errauste plantaren aurkako taldekoek. Horrela, 24,5 kilo organiko bildu zituzten (%62), hamar kilo paper (%25,3), 3,5 kilo edukiontzi horira botzatzekoak (%9) eta kilo eta erdi errefusa. “Beraz”, zehaztu dute, “garbi dago oraindik bide luzea geratzen dela gauzak ongi egiteko”. Azaldu dutenez, instituzioek “azpiegiturak egokitu arren”, herritar askok ez dituzte “gauzak ongi egiten, ez dituztelako birziklatzeko “. Datu “aipagarri” bezala, esan zuten irekitako poltsen hondakin organikoen gehiengoa merkataritzatik zetorrela. “Hondakin horiek beste bide bat hartu behar dute bilketarako”, adierazi zuten. Hurbildu zirenen artean eskuorriak banatu zituzten, eta bertan salatu zuten Errenteria-Oreretan, biztanleko, 231 kilo hondakin bidaltzen direla zabortegietara.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.