Aitzol Gogorzaren egoera salatzeko giza katea egingo dute ekainaren 27an
Sarek antolatu du ekitaldia; Iztietako anbulatorioa eta Gogorzaren etxea lotuko ditu
Agerraldia egin du, gaur eguerdian, Sare mugimenduak, Iztietako anbulatorioan. Giza eskubideen urraketak salatzen dituztela gogorarazi dute, eta egun presoek jasaten dituzten urraketekin bukatzeko lanean ari direla nabarmendu dute. Arreta berezia jarri diote Aitzol Gogorzaren egoerari: nahasmen obsesibo-konpultsiboa du, eta bere gaixotasuna egunetik egunera okerrera egiten duela salatu dute. “Tratamendu egokirik ez du” esan du Sarek, “eta espetxean egoteak ez dio mesederik egiten”.
Horregatik, ekitaldia antolatu dute datorren ekainaren 27rako. Giza katea egingo dute Iztietako anbulatoriotik bertatik Aitzol Gogorzaren etxeraino (Gaztañon dago). “Giza eskubideen alde dauden herritar orori” dei egin die Sarek egun horretan, 12:30ean, Foru Plazan elkartzeko. Bertatik bi zutabe irtengo dira, giza katearen hasiera eta bukaera puntuetara eta ibilbide osoan jendea egotea ahalbidetuko dute. Ondoren, Preso gaixoak askatu! Aitzol Etxera leloa duen pankarta pasako dute eskuz esku. Egun horri begira, informazio guneak atonduko dituzte Leku-zaharra, Landare, Juli, Museo del Vino, Reyna, Arkaitza eta Sindikato tabernetan, eta zerrendak egongo dira. Horrez gain, euren e-posta helbidera idatz daitekeela ere gogorarazi dute.
Iztietako anbulatorioan egin dute agerraldia
Hainbat ekitaldi
Sarek gaurko agerraldia aprobetxatu du egiten duten lana ezagutarazteko. Asteazkenero biltzen dira Merkatuzarren, eta han hainbat iniziatiba prestatu dituztela gogorarazi dute. Horrela, iazko abenduaren 31n argidun ehunka puxika askatu zituzten. Otsailean, berriz, irratsaioa sortu zuten Zintzilik Irratirako, eta hileko hirugarren asteazkenean emititzen dute. Apirilaren 19an S letra erraldoi bat osatu zuten Koldo Mitxelena plazan. Facebooken zein twitterren dituzte profilak.
