EH Bildu berriro gailendu da, eta Irabaziz-ek lau eserleku lortu ditu
600dik gora botoko aldearekin nagusitu da koalizio soberanista, baina PSE-EErekin berdindu du zazpi zinegotzirekin; sorpresa eman du Irabaziz-ek, hirugarren izanda
Luze, ohi baino luzeago iraun zuen boto zenbaketak bart gauean Errenteria-Oreretan. 21:30 inguruan %97a zegoen zenbatuta, eta emaitzek zortzi eserleku ematen zizkioten EH Bilduri, sei PSE-EEri, lau Errenteria Irabaziz-i eta hiru EAJri. Hiru ordu laurden baino gehiago behar izan zen emaitza baieztatzeko, erdiguneko mahai bat eta Galtzarabordako beste bat falta zirelako kontatzeko. Soberanista eta sozialisten artean dantzan zegoen dantzan zinegotzi postua, eta azkenean sozialistek eskuratu zuten, 92 botoko aldearengatik. Zazpina lortu dituzte bi alderdi nagusiek, baina Julen Mendoza egungo alkatea buru duen EH Bildu hautagaitzak lortu du irabaztea, 600 botoko aurrerapenarekin.
Beraz, zinegotzi bat galdu dute ezkerreko soberanistek, eta bat irabazi sozialistek. Gaueko sorpresa nagusia, berriz, Errenteria Irabaziz hautesle elkargoa izan zen. Ahal Duguk, Ezker Anitzak, Equok eta Alternativa Republicanak babestutako zerrenda indarrez sartu da Errenteriako Udalean, eta lau zinegotzi lortu dituzte.
EAJk, berriz, zituen hiru zinegotziei eustea lortu du. Hala ere, podium-etik atera da, eta laugarren indarra izango da. Eta azkena, PPk ez baitu ordezkaritzarik lortu. %5eko langara iristeko hiru hamarren falta izan zaizkio Chema Herzogi.
EH Bilduk Foru Plazan egin zuen kontaketa
Parte hartzeak, gora
Hauteskunde erroldan zeuden 31.000 errenteriarretatik %60,28 joan ziren hauteslekuetara euren papertxoa sartzera. Lehenengo parte hartze datuek, 14:00etakoek, bi puntu gehiago ematen zituzten, 2011koekin alderatuta. Azkenean, lau ehuneko gehiago joan ziren 49 hautes mahaietara, atzo. Termino absolutuei dagokienez, EH Bildu koalizioak 400 boto inguru galdu zituen —900 Aralarrekoak kontatuta—. Ehunekotan, %31,82rekin. Alderdi sozialistako alkategai Jose Angel Rodriguezek, berriz, Juan Carlos Merinok baino 300 boto gehiago erdietsi zituen atzokoan. Guztira, 5.276. Irabaziz-ek 3.518 boto eskuratu zituen, %18,85. Ezker Anitzak duela lau urte lortutako zinegotzi bakarra laukoiztu du. Podemos efektuak eragina izan du hor, eta Aralarri urratuko zizkion. EAJk, berriz, zituen hiru zinegotziei eutsi die. 400 boto inguru gehiago lortu ditu, aurreko hauteskundeetan Hamaikabatek lortu zituen berberak, gutxi gora behera. PPk kolpe latza jaso du, eta bi ordezkari izatetik, bakar bat ere ez izatea pasatu da. Botoen ia erdia galdu dute popularrek, eta 877 botorekin geratu da zerrenda eskuindarra.
