Erreklamazioak bideratzeko prest agertu da Agintaritza, eta egoera aztertu eta ondorioen berri emango dutela iragarri dute
Porlana egiteko darabilten clinkerra da kutsadura eragin duena
Azken egunotan kexa ugari izan dira Pasai Antxon portuko zama-lanek eragindako kutsadurarengatik. Kexak ez dira berriak, maiz sortzen baitira zama-lanei lotutako eragozpenak, baina azken egunotan sortutako kutsadura maila normalean baino askoz ere begi-bistakoa izan da.
Gaiak erreklamazio ugari eragin ditu, Portu Agintaritzaren komunikatua behartzeraino. “Pasaiako Portuak gertatutakoarengatik barkamena eskatu nahi du, izan ere, jasotako kexak medio, agerikoa da hartutako neurriek ez dutela espero zen emaitza izan”, esan dute.
Portuak azaldu duenez,
clinker-aren deskargak eragin du kutsadura. Porlana egiteko osagai nagusia da clinkerra, eta Agintaritzak esan duenez, ez da ohiko trafikoa
Pasaiako portuan. Aurten lehenbizikoz ekarri dutela zehaztu dute.
Lehengo astean hasi omen zen Mauritaniara joatekoak ziren Financiera y Mineraren –garai bateko Cementos Rezola– 17.000 tona clinker maneiatzeko lanak, eta materialak duen “hautsezko izaerarengatik” hainbat neurri hartu zituztela argitu nahi izan du Portuak. Besteak beste, “kamioiak gauez porturatzeko sarbidea ahalbidetu” zutela, eta “metatutako materiala estali” zutela argitu dute. Horrez gain, pala erabili ordez, garabia erabili dutela azaldu dute, “metatutako salgai-tontorra zabala baino altuagoa izaki, haizearen eraginpean gelditzen den azalera txikiagoa izateko”. Azkenik, biltegiratzeko eta atrakatzeko biltegi baten atzealdea esleitu zutela esan dute, “babes neurri bezala”.
Erreklamazioak kontuan hartzeko konpromisoa
“Gertaera Portuak solteko salgaiak hobeki maneiatzeko egiten ari den esfortzuarekin bat ez datorrelako kexu” agertu da Portua, eta epe motzean Ingurumen Jokabide Kodea sinatuko dutela iragarri dute.
Bide beretik, Portua “trafiko garbien aldeko apustua” egina duela nabarmendu dute, nahiz eta “solteko salgaien trafikoak Gipuzkoako enpresa industrialetan duen pisua” kontuan izanda, halako merkantzien trafikoari eustea funtsezkoa iritzi dion.
Edonola ere barkamena eskatu eta “edozein eragozpen izan duen orori” jakinarazi nahi izan diote Portu Agintaritza prest dagoela erreklamazioak bideratzeko.
