Beirak bertso eta musikaz margotu du disko berria
Boskote bihurtu da taldea, eta 'Margotu berria' disko berrian rockaren bidea urratu dute.
Margotu berria bigarren diskoa aurkeztu du gaur goizean Beira taldeak. Bertsoa eta musika batzen ditu duela hamarkada bat, Oiartzunen, Jon Martinek eta Igor Arruabarrenak sortu zuten taldeak. 2013an atera zuten bikote moduan estreinako diskoa, eta hiru fitxaketa egin dituzte disko berrirako: Gari Amundarain (gitarrista), Mikel Arruabarrena (bateria jolea) eta Urtzi Olaziregi (baxu jolea).
Talde bihurtuta, musikaren esparru berrietan murgildu da Beira, eta rockaren zelai zabalean bazkatzen dute. “Pop-a baino, rockaren iturritik edaten dute”, esan du Baga Biga diskoetxeko Ritxi Aizpuruk. Hala ere, Beira taldean hitzek musikak duen garrantzi bera duela uste du Aizpuruk. Izan ere, Jon Martinek “saltsa mehea” osatu du, Aizpururen arabera: “Letretan mina eta ametsak dira nagusi. Oso bertsolari diesel-a da Martin, eta inongo makulurik behar ez duten esaldi biribilak osatu ditu”. Musika estilo aldetik, Txomin Artola eta Sasoi Ilunak-en traza hartu die Aizpuruk, hip-hop, flamenko eta beste hainbat ukiturekin.
Bertso musikatua irauli nahian
Gari Amundarain gitarra joleak aitortu duenez, Margotu berria diskoarekin “bertso musikatuaren munduari buelta eman nahi izan diogu”. Azaldu duenez, bera metalaren mundutik dator, eta bazegoen hala nolako distantzia bat euren eta bertsolarien munduaren artean. Esaldiak biribilak izateaz gain, musikari ere ertzak kentzen saiatu dira: “Gitarra eta baxu erritmo sinpleek ez digute balio. Urtebete eman dugu diskoa fintzen”. Margotu berria diskoaren izenburuari buruz, gisa horretako koadro batekin alderatu du Amundarainek: “Ilusioz ikusten duzun zerbait da, baina badakizu ezin duzula ukitu”. Era berean, diskoa “atsegina eta erraz entzutekoa” dela iritzi du.
Bestalde, zuzeneko emanaldien berezitasun bat azpimarratu du Aizpuruk: Martinek diskoan, ustez, zurrun dauden letrekin inprobisatzea. “Ausardia eta trebetasuna eduki behar da horretarako”, esan du. Amundarainek jakinarazi duenez, jo behar duten tokien gaineko informazioa biltzen dute joan aurretik, eta gainera, bertako bertsolariren gonbidatu ohi dute, publikoarekin harreman estuagoa izateko.
Azkenik, Beiraren bi diskoetan parte hartu duen Igor Arruabarrenak bataren eta bestearen artean dagoen eboluzioa jarri du mahai gainean. “Letrek maila bera edo hobea dute, baina musika aldetik, askoz hobea da”, ziurtatu du. Gainera, abestiak moztu egin dituzte —”Joni [Martin] tripako minak eragin dizkion arren”—. “Diskoa argitaratu aurretik”, gogorarazi du Arruabarrenak, “hainbat elkarrizketetan erantzun nuen bigarren diskoan gure potentziala zein den ikusiko zela. Uste dut ikusten dela”.
Amundarain, Aizpuru, Olaziregi eta Igor Arruabarrena, gaurko aurkezpenean
