Fiskaltzak zortzi urteko zigorra eskatu du Beramendi alkate ohiarentzat
Txarako parkean eta inguruan egindako obren gainkostua milioi bat eurokoa izatea esan du fiskaltzak, hasierako proiektua apetaz aldatuta.
Gipuzkoako Fiskaltzaren behin behineko akusazio idatziaren arabera, zortzi urteko inhabilitazio zigorra eskatu dute Martin Beramendi Oiartzungo alkate ohiaren kontra. Beramendi 2003 eta 2007 urteen artean izan zen alkate, Eusko Alkartasunarekin, eta bere agintaldian Mendibilgo Txara parkea eta inguruak eraberritzeko obra esleitu zuen udalak.
Beramendiri “prebarikatu” izana leporatzen dio fiskaltzak. Parkearen obren proiektua 1,21 milioi eurogatik esleitu zuten, eta akusatuak, “bere kargua baliatuta”, lanak aldatzea ahalbidetu zuen, “kostua igoz”. Fiskaltzak argi utzi nahi izan du diru partidak handitzea ez zirela obretan egondako gorabeherei aurre egiteko erabili, “baizik eta proiektuaren barruko obrak baimentzeko, auzokideei eskariei erantzuteko”.
Idatziaren arabera, aldaketa horiek Etxaeneako lorategi lanetan, Manuel Lekuona kaleko galtzadarrien konponketan eta hilerriko lanak egiteko baliatu zituzten. Horiek aurrera eramateko, “akusatuak oinarrizko prozedura administratiboak egiteari muzin egin zion: ez zion Udaleko Idazkaritzari abisurik pasa, ez zuen zegokion udal batzordeetan informaziorik eman eta, ondorioz, ez zituzten Udalbatzan onartu, behar lukeen moduan”, gaineratu du fiskaltzak.
Inaugurazioa, bukatu gabe
Ministerio Publikoaren arabera betiere, Beramendik ez zuen aldatzeko proiekturik eskatu, eta ez zuen aurrekontutik partidarik esleitu. “Gainera”, ziurtatu du fiskaltzak, “obrak bukatu gabe —lorategiko lanak falta ziren— inauguratu zituzten, 2007ko maiatzaren 7an. Hauteskundeen aurreko egunetan izan zen, inaugurazio ekitaldi propagandistikoaren mekanikaren barruan”.
Fiskalak gogorarazi duenez, Alkatetza galdu zuen Beramendik, eta udalbatza berria sortu baino hiru egun lehenago obraren “proiektu aldatu bat” idaztea galdegin zuela. Horregatik, obraren kostua 2,2 milioi eurora igo zen, “Oiartzungo Udalak onartu zuena baino %82 gehiago”. Horren berri izatean, udalbatza berriak prezio berria gaitzetsi zuen, eta hartzekodunekin negoziatu ondoren, gainkostua milioi batekoa izan beharrean, 369.448 eurokoa izan zen.
Beste auzi bat zabalik dago Beramendiren kontra, eta bertan bi urteko kartzela eskatu dute.
Txarako parkean egin zituzten eraberritze obretan prebarikatzeagatik akusatu dute Beramendi
