Agerraldi bateratua egin dute, San Markos Mankomunitateko aurrekontuek epailearen sententzia betetzen ez duela salatzeko.
Xabier Arregi (Usurbil), Luis Intxauspe (Hernani) eta Jexux Leonet (Oiartzun)
Jexux Leonet Oiartzungo alkateak, Usurbil eta Hernanikoekin batera, agerraldia egin du Hernaniko udaletxean, San Markos Mankomunitatearen aurrekontuek
epailearen sententzia betetzen ez duela salatzeko. Horrela, hiru alkateek salatu dute “birziklatzeko ahalegina zigortu” nahi dela.
“Hori guk esaten dugu eta justiziak ere arrazoia eman digu”, zehaztu dute. Horrela, 2014ko aurrekontuei errekurtsoak jarri zizkietela gogorarazi dute, jasotako zerbitzuaren araberako ordainketa egitearen alde. “Horren ondorioz”, gaineratu dute alkateek, “hondakinak ongi kudeatzeak, birziklapenaren alde egiteak, onurak izan ditu urteotan: ingurumenarekiko onurak eta herritarren poltsikorako onurak”.
Egun Kultura diputatua den Denis Itxasorentzako ere hitzak izan dituzte. “Mankomunitateko presidente izatera iritsi zenean, esan zuen epaitegiek aginduko zutela nork zuen arrazoia. Epaileek erabaki dute, eta zerbitzuen araberako ordainketa defendatzen genuenoi eman digute arrazoia”, berretsi dute.
2016an, berriro
EAJk eta PSE-EEk osatzen dute mankomunitateko agintaritza. Epaiari “entzungor” egin diotela gaitzetsi dute hiru alkateek. Izan ere, aurtengo aurrekontuan, berriro, jasoko ez dituzten zerbitzuengatik kobratuko diete hiru udal horiei. “Jarrera arduragabea” dela iritzi dute, eta herritarrei “kalte” egiten diotela azaldu dute: “Inguruko herrien gastua hartu behar dute bere gain”. 177.000 euro dira guztira.
Oiartzun, Usurbil eta Hernaniko alkateen arabera, euren udalei udalei ez ezik, gainontzekoei ere kalte egingo die erabakiak. “”Batetik”, aipatu dute, “birziklatzeko ahaleginik handiena egiten duten duten herritarrak kaltetzen ditu, baina baita ere orain arte zegokiena ordaindu ez duten herriak ere”. Sententziaren aplikazioaren atzerapenaz ere ohartarazi dute: “Zenbat eta gehiago luzatu, handiagoa izango da denon artean ordaindu beharreko zorra”. Ildo horretan, Errenteria-Orereta, Donostia eta Lasarte-Oriako herritarrei “bereziki eta zuzen-zuzenean” eragingo diela azaldu dute. Horregatik, sententzia ahal bezain laster aplikatzea esaktu dute.
GHKren tarifak
San Markosen jarreraz gain, Gipuzkoako Hondakinen Kontsortzioarena (GHK) ere arbuiatu dute. “Birziklatzeko ahaleginak egiten dituzten herritarrak saritu beharrean, zigortu egiten dituzte. Horren adibide da tarifen igoera berria”, kritikatu dute.
GHK eta Gipuzkoako Foru Aldundiak errauste planta eraikitzearekin “itsututa” daudela iritzi dute, eta erakundearen zorrak estaltze aldera, errefusaren gaineko tarifa ez ezik, organikoarena ere igo dute. “GHKren estatutuek gaikako bilketa saritzen dutela diote, baina erabaki honek argi utzi du gutxiago sortu eta gehien birziklatzen dutenak zigortzen dituztela”.
Bi galdera egin dizkiete GHK kudeatzen dutenei: “Zer dela eta zigortzen dituzue gutxien sortzen eta gehien birziklatzen dituzten herritarrak? Zergatik igo duzue organikoaren tarifa?”. Tarifen igoera “errauste plantaren dirdirak itsututa, ingurugiroaren, osasunaren eta herritarren ongizatearen aurkako erabakia hartu dutenaren adierazgarri da”.
Azkenik, argi utzi dute euren lehentasuna ordezkatzen dituzten udalerrietako herritarren interesak defendatzea dela. “Gipuzkoako agintean daudenei ere dei egiten diegu gipuzkoarren interesak babesteko”.
