Etxebizitza politika integrala abiarazi nahi du udalak

Etxebizitza hutsen azterketa egin dute, lehen urrats bezala. Alokairu eskaintza "egokiak" eskaini nahi dituzte.

2016/02/17

Etxebizitza politika integrala abiarazi nahi du udal gobernu taldeak, hauteskunde programan jaso bezala

Oiartzungo Udalak etxebizitza politika integrala martxan jarri nahi du, eta lehen urrats gisa, etxebizitza hutsen gaineko azterketa egin dute. Gaindegia Euskal Herriko gizarte eta ekonomia garapenerako behategia izan da lan hori egiteko ardura hartu duena. Udalaren helburua etxebizitza hutsak dituzten etxejabeei alokatzeko bitartekoak jartzeko eskaintzea da. Era berean, maizter izan daitezkeenak ere erakarri nahi dituzte programara. Horrela, erabiltzen ez diren etxebizitzak erabilgarri jarrita, herrian bizitzeko aukera berriak sortu nahi dituzte etxebizitza politika integralaren bitartez. Alokairu eskaintza “egokiak” eskaini nahi ditu udalak. 357 etxe huts Gaindegiaren azterketak alokagai jarri litezkeen etxebizitzak sailkatu ditu, kokapena, azalera eta antzinatasunaren arabera. Horrela, 357 etxebizitza huts daude udalerrian. Laurdena baino gehiago (%26,3), baserri eremuan daude. Elizalde eta Altzibar dira etxe huts portzentaia handiena duten auzoak: %18,2 eta %13,4, hurrenez hurren. Horietatik guztietatik, lagin bat hartuko du udalak, alokairura bideragarriak zein izan daitezkeen aztertuta. Etxejabeekin adostuko lukete gero, merkaturatzeko. Gainera, Eusko Jaurlaritzako zerbitzuko arduradunekin bildu dira udaleko ordezkariak, Bizigune egitasmoaren bitartez hainbat etxebizitza alokairuan jartzea aztertzeko. Etxebizitza horiek oiartzuarrei bideratu nahi die udalak. Gobernu taldearen lehentasunetako bat da etxebizitza politika integrala martxan jartzea, programan hartutako konpromisoa izan zelako. Gainera, diru erreserba bideratu dute 2016ko aurrekontuetan horretarako. Etxebizitza hutsei buruzko lanketa etorkizuneko etxebizitza hutsen politika “eraginkorra” garatzeko pauso garrantzitsutzat jo du udalak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.