Lehenengo sektorearen jarduera tasa %0,92 da. Kopuru hori handitu nahi du udalak, baliabideak emanez. Lehen fasea baratza profesionalek osatuko dute.
Nekazaritza lurrak esleituko ditu udalak.
Oiartzungo Udalak,
otsaileko plenoan jakinarazi zuten bezala, Lurbizi egitasmoa martxan jarri du. Lehenengo sektorea bultzatuko duen proiektu zabala da, eta hainbat proiekturen aterpe izango da Lurbizi.
Lehenengo sektorearen jarduera %0,92 da soilik. Gainera, Gaindegiak udalerriko etxebizitza hutsei buruzko ikerketan argitu zuenez, landa eremua da etxe huts gehien dagoen tokia (94, guztira). Gainbehera horrekin kezkatuta dagoela adierazi du udalak, eta horri altxatu nahi dute pixkanaka. Aurten 40.000 euro bideratuko dituzte horretara.
Baratza profesionalak
Lurbizirekin, nekazaritzan ibili nahi duten herritarrei erraztasunak ematea da helburua. Izan ere, udalak jakinarazi du badaudela lehenengo sektorean jarduteko proiektuak dituzten herritarrak, baina lurrik ez dutenak. Eta alderantziz: euren lurrak lantzen ez dituzten herritarrak.
Horrela, lehen
haziak baratza profesionaletan ereingo dituzte, Behemendirekin elkarlanean. Horiek kudeatuko dute proiektua, eta udalak finantzatuko du. Guztira, 25.000 metro koadro jarriko dituzte alokairuan, gutxienez 5.000 metro koadroko azalera duten eremutan banatuta. Behemendi nekazaritza produkzioa martxan jartzeko azpiegituren azterketa egiten ari dela adierazi dute.
Alokairua lehiaketa publiko bidez esleituko dute. Lehentasuna izango dute Oiartzunen erroldatutako nekazariek eta langabezian daudenek. Arloko ikasketak edukitzea edota esperientzia edukitzea, besteak beste, kontuan hartuko dute. Baratzeek emango duten uzta salmenta zuzenez eta herriko merkatarien bitartez saldu ahal izango dute.
Elikadura burujabetzaren bidean
Lehenengo sektorea sustatzea ez da egitasmoaren asmo bakarra. Horrela, elikadura burujabetza berreskuratu nahi du udalak. “Azken urteetan sektore ekonomikoen desorekarengatik kanpoko ekoizle eta produktuekiko dependentzia sortu da”, esan du udalak. Horrela, elikaduran burujabe izateko tokian tokikoa kontsumitu behar dela berretsi dute.
Herrian bertan bide hori urratzen hasi direnen adibideak jarri dituzte: Agroaldea, nekazaritzara bideratuta dauden udal lurrak; eta Arraztalo kontsumo taldea. Burujabetzaren bidean, merkatari txikiek, herri mugimenduek eta ikastetxeek eskuz esku joan behar dutela iritzi du udalak. Horrekin lotuta, gogorarazi dute herriko ikastetxeetan gai hori hori lantzen ari direla, Eskola 21 Agendaren barruan.
