Hilaren 28an, tren berdean Arditurrira joateko prezio berezia jarriko dute. Bisita gidatuak gainontzeko egunetan ere eskainiko dituzte.
Tren Berdean joateko erreserba egin beharko da
Egun hauetako eguraldi petralak kanpoaldean egiteko antola litezkeen plan asko zapuztu ditzake. Arditurriko meategian, baina, ez dute arazo hori. Naturarekin harremanetan ahalbidetzen dute, mendiaren barruan eta busti gabe.
Arditurriko meategiak ezagutzeko Aste Santua aukera ona dela iritzi dute Gipuzkoako Parketxe Sareak eta Arditurri kudeatzen dutenek. “Askotan uste da meategiak leku ilun, itsusi eta kaotikoak direla, baina Arditurriko barnealdea ikustean beste ideia batekin aterako da bisitaria”, esan dute. Horrela, meatzeak bisitatzeko ordutegiak gogorarazi dituzte: 10:00etatik 14:00etara, asteartetik ostiralera eta igande eta jai egunetan. Larunbatetan, goizeko ordutegiaz gain, 16:00etatik 18:00etara ere bisita daitezke. Euren kabuz edo Oiartzungo Done Eztebe plazatik ateratzen den tren berdean joan daitezke. Kasu horretan, erreserba egin behar da
e-posta edo telefono bidez (943 49 45 21 edo 943 49 50 49).
Hilaren 28an, prezio bereziak
Aurten eskaintza berezia egingo dutela jakinarazi dute Arditurriko meategiak kudeatzen dituztenek. Hilaren 28an, astelehena, prezio bereziak jarriko dituzte, eta Pagoaldea industrialdetik irtengo da Tren Berdea. Horrela, oinarrizko bisitak bost euro balioko du (hiru euro, bost urtetik beherakoentzako) eta sakoneko bisitak sei, trenaren bidaiak barne.
Trena hirutan aterako da Pagoaldetik: 10:00etan, 11:00etan eta 12:00etan. Hogei minutu iraungo ditu bidaiak, eta bueltako ordutegiak 11:30ean, 12:30ean eta 13:30ean izango dira. Tren bakoitza bisita hauek egiteko egokituko zaie bisitariei:
- Trena: 10:30etik 11:15era (bisita sakona) eta 10:45etik 11:15era (oinarrizkoa).
- Trena: 11:30etik 12:15era (bisita sakona) eta 11:45etik 12:15era (oinarrizkoa).
- Trena: 12:30etik 13:15era (bisita sakona) eta 12:45etik 13:15era (oinarrizkoa).
