Denak batuz herria askatu lelopean Elkartasun Eguna antolatzen ari dira Buruntzaldea, Donostialdea eta Oarso Bidasoa eskualdeetako Denak Ala Inor Ez taldeak elkarlanean.
Denak Ala Inor Ez dinamikako kideen agerraldia.
lelopean Elkartasun Eguna antolatzen ari dira Buruntzaldea, Donostialdea eta Oarso Bidasoa eskualdeetako Denak Ala Inor Ez taldeak elkarlanean. Iniziatibak badu data, ekainaren 10a, eta baita kokalekua ere, Errenteria-Oreretak hartuko du. Elkartasun Egunerako sei hilabete falta badira ere, aurkeztu dute jada Errenteria-Oreretan.
Gatazken ondorioek oraindik bizirik dirautela esan dute antolatzaileek, “eta ondorio horiek pairatzen baditugu ere, euskal gazteriaren sektore bat ez da horren jakitun. Geroz eta aldarri gutxiago ikusten ditugu kalean, gazteon arteko hizketagai nagusien artean ez dago berau, jendartean ez dago gaia”. Denak Ala Inor Ez dinamikaren barruan, ordea, ezinbestekotzat jotzen dute gaia lehen lerroan kokatzea, “askapen mugimendurako”.
“Etxeetan, herriko asanbladetan edota tabernetan gehien maite ditugunak falta dira, sasi bake prozesuak hasi baziren ere, eta gu gazteak, ez gaude prest kartzelak beterik ikusten jarraitzeko, astebururo amaiezinak diren kilometroekin jarraitzeko edota gure kide ziren eta diren lagunak ahazturan erortzen uzteko”, esan dute.
Gaur egun 350 euskal preso direla espetxetan ekarri dute gogora, eta horietatik hamaika larri gaixo daudela nabarmendu dute, eta zuri beltzeko argazkietatik aterata gazteen bizitzan presente jarri nahi dituztela: “Badakigu ez dela erraza ziegetako barroteak hautsi eta denak etxera ekartzea, baina ezinbestekoa dela iruditzen zaigu gazteria honen jakitun izatea, eta behin jabe izanik aurrera pausoak ematea”. Horregatik Denak batuz herria askatu lelopean presoen gaia mahai gainean jarri nahi dute eta iniziatiba ezberdinak antolatuko dituzte ekaina bitartean, “euskal gazteria berauetan parte hartzera deitzen dugu, guztiok jarri behar dugulako gure ur tanta, itsaso haserre bat sortu eta kartzeletako barroteak hautsita herri aske bat sortzeko”.
Ekainaren 10ean egun osoko ekitaldia egingo dutela aurreratu dute, eta horrekin batera etorkizunari begira dinamika abiatuko dute, “gure egunerokotasunean, euskal preso eta iheslariak presente egon daitezen”.
