Ikasleak hasiko dira Ihoteetako giroa sortzen

Elizalde Herri Eskolakoek kalejira eta emanaldia, besteak beste, egingo dituzte goizean. Haurtzarokoen txanda arratsaldez izango da.

Erik Gartzia Egaña

Oiartzun

2017/02/13

Elizaldekoek geldialdia egingo dute plazan, dantzatzeko.

Datorren ostiralean hasiko dira Ihoteak. Hasiera ofiziala 19:00etan izango bada ere, herriko ikastetxeetakoak izango dira festa girotzen hasiko direnak. Elizalde Herri Eskolakoak izango dira zakua janzten lehenengoak. Goizean goiz, 09:00etan, elkartuko dira geletan, eta ordu erdi beranduago irtengo dira kalejiran. Honako ibilbidea egingo dute: Elorrondo kalea, Arraskularre, Aialde, Arizmendi-enea jauregiko lorategia, Doneztebe plaza eta eskolara buelta. Bide horretan egingo dituzte geldialdiak. Arizmendi-eneko lorategietan Bertso Eskolakoek sortutako lau kopla sorginei abestuko dizkiete eta plazan, berriz, dantzen txanda izango da. Ihote Baltsa, Borobila eta Txapelua abestien doinura mugituko dira ikasleak. Eskolara bueltatzean, hamaiketakoa egingo dute, eta 11:00etan berriro kalejira egingo dute. Laburragoa izango da, Elorsoro kiroldegia izango baita helmuga. Ospakizunarekin bukatzeko, emanaldia egingo dute bertan. Haurtzaro, arratsaldean Haurtzaro Ikastolakoek, berriz, arratsaldean jantziko dituzte zaku eta kapelak. Horrez gain, ikastolaren 50. urteurrena ospatzeko zapi urdina eramatea ere eskatu dute. 15:30ean geratu dira ikastolako anfiteatroan. Ikastolako ikasle guztiak irakasleekin batera elkartuko dira bertan, eta sorginekin batera dantza egingo dute. Ordubete beranduago, Ihoteei deitzeko burrunba egingo dute. Ikastolatik plazaraino igoko dira, musika instrumentuekin soinua eginez. Burrunba entseatzeko, berriz, bezperan jarri dute zita: anfiteatroan geratuko dira, 17:00etan. Behin burrunbaren segizioa plazara iritsita, txokolate jatearen txanda izango da. Sabelak betetzeaz gain, musika eta dantzaren txanda izango da: Ihoteen hasierara arte, Haurtzaro Dantza Taldekoek inauterietako dantza berri bat erakutsiko diete bertara hurbiltzen direnei. Ondoren, mutxikoak dantzatuko dituzte denek elkarrekin, sorgin eta intxixuak etorri arte.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.