Bihar arratsean hasiko dira 2017ko Ihoteak. Dena prest du Ihote Taldeak, baita herriko ikastetxeek ere, hiru egun magiko bizitzeko.
Auzoko koloreak dituzten banderak prestatzen aritu ziren atzo, udaletxetik zintzilikatzeko.
Dena prest dago 2017ko Ihoteak ospatzeko. Bihar iritsiko dira Oiartzunera sorgin eta intxixuak, eta Ihote Taldeak asteburu osorako ekitaldiak prestatu ditu.
Hasiera, modu ofizialean, 19:00etan izango da, baina lehenago herriko ikastetxeek
ihote giroa ekarriko dute herrira.
Elizaldekoak 09:00etan hasiko dira ospakizunekin eta Haurtzarokoak, berriz, 15:30ean.
16:45ean abiatuko da burrunba, ikastolatik plazaraino. Han txokolate jatea egingo dute, eta azeri eta sorgin dantza emanaldiak ikusteko tokia hartuko dute. 19:00etan izango da dantza emanaldia, eta bukatzean iritsiko dira Ihoteetako protagonista nagusiak. Ondoren, zakuak gainean dituztela, poteoa egingo dute herriko tabernetan.
Hori guztia biharko egunari dagokionez. Larunbatean eta igandean honakoa izango da egitaraua:
Otsailak 18, larunbata
- 09:00etan: Kuestazioa, herriko zortzi auzoetan, poxpolinez jantzita.
- 14:30 inguruan: Bazkariak, auzoko elkarteetan.
- 18:00etan: Auzoetan ibilitako kuadrillak plazan elkartuko dira.
- 19:00etan: Eonian elektrotxarangarekin poteoa tabernaz taberna.
Otsailak 19, igandea
- 09:00etan: Diana, txistulariekin.
- 11:00etan: Karroxa eta kalejira, Beheko Plazatik.
- 19:00etan: Intxixu eta sorginei agurra, eta suzko akerra.
