[Galeria] Etorkizunaren aldeko oihu isila

Iruñean atxilotutako lau gazteen gurasoek deitutako manifestazioarekin jendetzak egin du bat. "Denen artean" etxera ekartzea lortuko dutela esan dute.

Erik Gartzia Egaña

Errenteria-Orereta

2017/03/18

Ehunka lagunek hartu dute arratsaldean egindako manifestazioan.

Orain dela astebete Iruñean atxilotutako Errenteria-Orertako lau gazteen askatasuna eskatu dute gaur arratsaldean. Gazteen gurasoek deitutako manifestazioarekin ehunka lagunek bat egin dute, Gure seme-alabem etorkizunaren alde! Errenteria/oreretarrak aske! pankartaren atzetik. Manifestazioa, antolatzaileek atzo eskatu bezala, isila izan da. Hasi eta berehala, ordea, isiltasun hori hautsi du txalo zaparrada batek. Gamon Zumardia gurutzatu, eta Nafarroa Etorbidean gora joan da manifestazioa. Alabergako biribilgunean itzulia eman eta Biteri kalean barrena abiatu da. Oso jendetsua izan da mobilizazioa. Esaterako, burua Morrongilleta parean zenean, oraindik, atzealdekoek ez zioten biribilguneari buelta eman oraindik. Hasitako tokian, Herriko Plazan, bukatu da manifestazioa. Gurasoak, emozioak hartuta, parrokiako eskaileretan jarri dira, berriro, eta haietako batek mikroa hartu du. Hitz gutxi esan ditu, baina oso argiak: “Denen artean lortuko dugu etxera ekartzea”. Txalo zaparrada bikoitzarekin erantzun diete.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.