San Pedroko traineru testean, txikikeria gutxi
Traineruen sasoia hasi aurreko azken prestaketa estropada izango da .46 traineru bilduko dira bihar Pasaiako badian
Bihar, Sanpedrotarra Arraun Elkarteak antolatuta, traineruen sasoia prestatzeko hirugarren eta azken estropada egingo dute Pasaiako badian, San Pedroko IX. Traineruen Test Entrenamendua. Aldi berean, Euskadiko Distantzia Luzeko Txapelketa izango da San Pedrokoa. Orotara 46 traineruk parte hartuko dute 17:00etan hasiko den lehian. Jada serio hartu beharrekoa da biharko estropada.
Estropadaren kokalekua Pasaiako badiako ohikoa izango da. Hau da, irteera eta helmuga San Pedroko Torreatze eta Donibaneko Santiago plazaren inguruan egongo da. Lehia erlojupekoa da, eta lau luze eta hiru ziaboga egingo dituzte partaideek. Orotara, 650 arraunlari inguruk bat egingo dute Pasaian.
Neguko lehen test entrenamendua, Gipuzkoan, Orion egin zuten otsailaren 11n, eta bigarrena Hondarribian otsailaren 25ean.
Hiru txanda
Erlojupekoa hiru zati edo txandatan banatuko dute. Lehenean, beteranoak (sei traineru), emakumeak (bederatzi traineru) eta senior mutilen hainbat traineru (11 denera, tartean Galiziako hainbat) arituko dira. Emakumeen artean, Lea-Artibai, Hondarribia, Zumaia, Hernani, Hibaika, Kaiarriba, Donosia-Arraun Lagunak, Orio eta San Juan dira lehiakideak. Beteranoetan, honakoak: Indianoak-Ternua, Ibaialde, Zarautz, Fortuna, Arkote eta Zumaia.
Bigarren txandan B ontziak eta KAE Ligakoak izango dira lehian, eta hirugarrenean, gizonen atalean irabazteko hamar faboritoak, tartean Orio, San Juan, Kaiku, Hondarribia, Urdaibai eta San Pedro. 
