[Galeria] Oreretako lau gazteak askatzea eskatu dute ehunka lagunek

Oreretako 4ak Askatu plataformak deituta manifestazioa egin dute Iruñean atxilotutako lau gazte oreretarrak askatzea eskatzeko. Ehunka lagun elkartu dira.

Ikerne Zarate Gartziarena

Errenteria-Orereta

2017/07/22

Mnaifestazioa Txosnagunean amaitu da.

Oreretako 4ak Askatu plataformak deituta manifestazioa egin dute Iruñean atxilotutako lau gazte oreretarrak askatzea eskatzeko. Ehunka lagun elkartu dira. 20:00etan abiatu da manifestazioa txosnagunetik. Ibilbidean zehar espetxeratuta dauden hiru gazteen aldeko oihuak, baita presoen aldekoak ere entzun dira, eta bengalak piztu dituzte hainbat lagunek Iruñeko espetxean dauden hiru gazteen askatasuna eskatzen zuten pankartak erakusten zituzten bitartean. Bederatziak jota amaitu da manifestazioa hasitako leku berean. Plataformak irakurketa egin du bertan, eta bildutakoei eskerrak emanda, talde sozial, politiko, alderdi eta banakoak deitu ditu, “gazte hauen askatasunaren aldeko borrokara batu daitezen, elkartasunaren eta askatasunaren alde indarrak batuz”. Gazteak kriminalizatu eta komunikabideek gertatutakoren gaineko irudi faltsua zabaldu dutela salatu du plataformak, “zenbait ekintza leporatu zaizkie, eta gazte hauek Euskal Herrian eta gainontzeko Espainiako Estatuan gertatzen ari den errepresio politikoaren areagotzea salatzera joan ziren manifestazio hartara”. Atxilotu aurretik lan sozial eta politiko garrantzitsua egin zutela nabarmendu dute berriz ere, “kapitalismoaren injustiziak salatuz eta gehien sufritzen dituztenekin batera lan eginez”. “Errepresio politikoa” kapitalismoaren “funtsezko egitura” dela gaineratu du plataformak: “Langileria, herri eta gazte mugimenduak mendean hartzeko tresna. Bertsio ofizialak dioenez gazte hauek indarkeria erabiltzeagatik atxilotu eta espetxeratu dituzte, estatuak milaka familia beren etxeetatik indarkeriaz kanporatzen dituen bitartean, errefuxiatuak mugetatik modu basatian botatzen dituen bitartean, etxe askotan jatekorik edota negu gorrian argindarrik gabe izatea onartzen duen bitartean”. Sistemak jarraitu bitartean “errepresio politikoak” jarraituko duela esan dute, eta horren harira gazteen alde borrokatzearekin batera kapitalismoaren kontra borrokatzera deitu dute, “horrek ziurtatuko du errepresio kasu gehiago ez ematea”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.