Aritu edo aditu; denak du balio
‘Konpromisotik aD/Ritzera’ kanpaina egingo dute abenduan, euskararen erabilera sustatzeko helburuarekin. Erabileraren jaitsierak bultzatu ditu horretara
Gaur zortzi aurkeztu zuten kanpaina.
Lagunen arteko solasaldiak euskaraz egiten saiatuko dira ahobiziak; ezezagunekin aritzean, lehen hitza.Tailerretan ondorioztatu zuten esparru askotan zereginak zeudela. Bereziki, euskaldunen kontzientziazio mailan indar egitea. Orduan, taldetxo bat sortu zuten, Ttur-tturren, udalaren eta norbanakoen artean. Beste herri edo auzoetan —Lasarte-Oria, Errenteria-Orereta, Agurain, Egia…— zer egin izan duten begiratzen hasi, eta eredua inportatu nahi izan zuten. «Herri horiek ez dira euskararen arnasguneak», nabarmendu du Arnaizek, «eta gure buruari galdetu genion ea eredu horrek guretzako balio duen. Argi dagoena da balioko duela jarrerak eta jokaerak azaleratzeko. Euskaldun asko daude euskaraz hitz egiten ez dutenak, eta ez dira kontziente». Hori guztia kontuan hartuta, uztailean deialdi bat egin zuten, baita hil honen hasieran ere, eta herriko eragileei euren asmoak azaldu zizkieten. Agertu zirenei esan zieten ekarpen ona izan zitekeela euren elkarteetan asmo horien berri ematea. Konpromisotik aD/Ritzera kanpainaren aurkezpen publikoa gaur zortzi egin zuten. Abenduaren 2tik 15era egongo da indarrean, eta herritarrek bi modutara har dezakete parte: ahobizi edo belarriprest izaten. Lehena euskaraz hitz egiteko gai direnei zuzenduta dago. Bigarrena, hitz egiteko ahalmenik ez, baina ulertzeko gai direnei. Bakoitzak bere txapa identifikatzailea eskuratu ahalko du. Euskara ulertzen dutenei dagokienez, Arnaizek esan du kopurua uste baino handiagoa dela. Hori bai, eurekin euskaraz hitz egiteko ohiturarik ez dagoela uste du: «Pentsatzen dugu ez duela nahikoa ulertzen edo ez digula ulertuko; ez dakigu nola hitz egin behar diogun… Baina posible da. Hori da nabarmendu nahi dugun gauzetako bat: elkarrizketa elebidunak eduki daitezkeela». Belarriprest-en helburua aldarrikatu du: «Asmoa da esan dezaten euskaraz hitz egin daitekeela beraiekin; ‘háblame en euskera que te entiendo’, alegia».
Elkarrizketa elebidunak izan daitezen saiatuko dira ‘belarriprest’-akModu batera edo bestera parte hartu nahi duten oiartzuarrek galdetegi bat bete beharko dute. Oiartzuarrak Ga-n bete daiteke, edo udaletxean edo ikastetxeetan orrialdea entregatuta. Gainera, azaroaren 14, 15, 17, 23 eta 24an izena emateko mahaia jarriko dute Fermiñenen. Egun horietan jaso ahal izango dira Onintza Etxebestek diseinatutako txapak. Kanpainaren azken egunerako, world cafe bat antolatu dute, bakoitzak izan dituen esperientziak partekatzeko. Iragarri dutenez, ikuskizun sorpresa bat egongo da. Girotzea Konpromisotik aD/Ritzera kanpainaren aurretik, azaroan, sentsibilizazio kanpaina antolatu dute. Hizlari erakargarriak hurbildu nahi dituzte Oiartzunera. Horrela, hil horren 8an Garbiñe Petriati eta Estitxu Eizagirrek Euskaldunen hizkuntz eskubideak eta jokabideak izeneko hitzaldia emango dute. 14an, Lorea Agirre eta Idurre Eskisabelek euskara eta feminismoa aztertuko dituzte. Bukatzeko, 22an Lutxo Egia eta Pako Aristi idazleen arteko solasaldia entzuteko aukera egongo da. Horrez gain, azaroaren 25eako TELP ikastaroa antolatu dute. Arnaizek argi utzi nahi izan du kanpaina ez dela helburua, beste urrats bat gehiago baizik: «Iruditzen zaigu udalerri euskaldunetan pauso gehiago eman daitezkeela. Ez da helmuga; hau da bidean probatu nahi dugun urratsa. Iruditzen zaigu emaitza onak eman ditzakeela. Urrats aurrerakoiagoak eman nahi ditugu; Oiartzun herri euskalduna izanda, horretarako aukerak baditugu».
