Euskararen Astea antolatu dute, hainbat ekitaldirekin; festa nagusia larunbatean egingo dute
Hainbat oiartzuarrek eman dute izena ‘Konpromisotik aD/Ritzera’ kanpainan. Larunbatean hasiko da, abenduaren 15era arte.
Euskararen Eguna da datorren igandean. Gure herriari izena ematen dion hizkuntzaren eguna behar bezala ospatzeko, eta bere erabilera sustatzeko, Euskararen Astea antolatu dute Oiartzunen. Ostegunetik igandera bitartean ekitaldi ugari antolatu dituzte herrian.
Kantaldi batekin hasiko da astea. Bigarren aldiz, Haziak egitasmoak eta Torri Gukin-ek belaunaldi ezberdinen artean kultura ondarea transmititzeko saioa egingo dute. Abaraxka ludotekan izango da, 17:00etan hasita.
Ostiralerako, berriz, zita bikoitza jarri dute.
Pasaiako Badia dokumentala ikusteko aukera egongo da, 19:00etatik aurrera, udaletxeko pleno aretoan. Pasaiako sarraski du ardatz, eta 1984ko martxoaren 22an gertatu zena aztertzen dute.
Dokumentalean hildakoen senideek parte hartu dute, baita Joseba Merinok eta Rosa Jimenok ere, gertaeren lekuko zuzenek. Horrez gain, Pasaiako herritarren testigantzak bildu dituzte, Santi Gonzalez eta Miguel Castells abokatuen adierazpenekin batera.
Emanaldiaren ondoren, solasaldia egingo dute. Yuri Agirre zuzendariak eta Peio Aizpuru segadan hildako baten senideak hartuko dute parte.
Euskararen Festa
Bada hilabete pasatxo Konpromisotik aD/Ritzera kanpaina egingo zutela ofizialki iragarri zutenetik. Datorren larunbatean, hilak 2, hasiko da. Ez du nolanahiko hasiera izango, gainera: Euskararen Festa antolatu dute, ia egun osorako.
Eguerdian hasiko da, dultzaineroen kalejirarekin. Ordu bererako, Kuadrillategikoek haurrentzako jolasak prestatu dituzte, eta herria apainduko dute. 12:30etik 13:30era muxikoen emanaldia izango da, kaskoko kaleetan zehar.
Bazkaltzeko tartea hartu ondoren, indartsu hasiko da arratsaldea. 16:00etan trikitilariak kalejiran abiatuko dira. Euskararen Festa Erraldoiaren aperitiboa izango da hori, 16:30etik aurrera jai giroa —are gehiago— nagusituko baita.
Euskararen Astea bertso doinuekin itxiko dute. Igande eguerdian bertso-poteoa egingo dute, herriko tabernetan zehar. Iraitz Mateo, Jon Otegi, Jokin Irastorza eta Josu Ibarguren ariko dira bertsotan.
