Gaikako bilketaren gaineko sentsibilizazio kanpaina antolatu du udalak

eskola agenda 21

Informatuz eta sentsibilizatuz eragin nahi duen kanpaina abiatu dute.

Birziklatze tasak hobetzeko helburuz Pasaiako Udalak gaikako bilketaz eta birziklatzearen garrantziaz sentsibilizatu nahi duen kanpaina bat abiatuko du gaur hasi eta maiatza bitartean. Honenbestez,  ingurumen arloko informatzaile talde bat kalez kale ibiliko da gaurtik aurrera.

Kanpaina Oarsoaldearekin batera aterako dute aurrera. Eskualdearen garapenerako enpresak langabezian dauden pertsonak kontratatuko ditu kanpainarako.

Izaskun Gomez alkateak adierazi duenez, lehen urratsa herritarrak informatzea izango da, gai honetan “inposaketa” baztertu behar dela defendatuta.

Hiru fasetan, maiatza bitartean

Hasiera batean informatzaileak edukiontzien inguruan ariko dira, 07:30etik 12:00etara. Herritarrak izan ditzaketen zalantzak argitzea izango da helburua. Barrutiz barruti txandaka arituko dira.

Zehaztu dutenez, kanpaina aurrera eramateko estrategia ugari erabiliko dituzte.  Galdetegi bat erabiliko dute, eta  edukiontziei eta biltzen diren hondakinen tratamenduari buruzko informazioa emango dute.

Halaber, tokian bertan edo telefono deien bitartez, herritarren zalantzei erantzuna emango diete, eta aldi berean, hondakin gaietan haien proposamenak eta ekarpenak jasoko dituzte.

Kanpainaren bigarren fasean, merkatariengana eta herriko hainbat eragilerengana jotzeko asmoa dute. Establezimenduetara bisitak egingo dituzte, eta prestakuntza saioak eskainiko dituzte, martxoa eta apirilean zehar.

Azkenik, proiektua bukatzeko, ondorioen ebaluazioa egingo dute hirugarren fasean, modu kualitatibo zein kuantitatiboan.

Ebaluazio kualitatiboa egiteko, informazio osoa ez ezik, herritarrek emandako erantzunak eta ekarpenak izango dituzte kontuan, aurrerago beste ekintza batzuk diseinatu ahal izateko.

Ebaluazio kuantitatiboa egiteko, azkenik, apirilean eta maiatzean edukiontzietan jasotako errefusaren eta gainerako hondakinen zenbatekoa neurtuko dute, iaz  hilabete berberetan jasotako kopuruekin alderatzeko.

 

 

 

 

Ez dago ekarpenik

Egin iruzkin bat

*

*


*

Send this to friend