Asteazken arratsaldean aurkeztuko dute Joxelu Trekuk taldeko kideak idatzitako liburua; abestientzako tartea ere egongo da
![oskarbi](http://oarsoaldea.hitza.eus/site/files/2016/03/oskarbi-300x187.jpg)
Oskarbi taldeko Jose Luis Treku, liburuaren egilea, eta Iñaki Maritxalar, jarraitzen duten sortzaile bakarrak.
Mende erdia baino gehiago bete da Oskarbi musika taldea sortu zenetik. Antxo, Errenteria-Orereta eta Lezoko hainbat gaztek sortu zuten, Don Bosco ikastetxean, 1966an. Hurrengo urtean Ez Dok Amairu mugimenduan sartu ziren, eta ordutik etenak izan zituzten.
2016an bete zituzten 50 urte, eta urteurrena ospatzeko kontzerturik ez zen falta izan. Orduan hasi zen Joxelu Treku taldeko sortzailea Oskarbi taldearen ibilbidea jasotzen, liburu batean jasotzeko. Pasa den urtearen bukaeran aurkezpen
ofiziala egin zuten, eta orain herri batzuetan aurkeztu nahi dute. Oiartzunen izango da
Doinu zaharren haritik, euskal kantu berriaren bidean (Oskarbi taldea 1966-2017) liburuaren hurrengo aurkezpen saioa.
Datorren asteazkenean izango da, Manuel Lekuona bibliotekan, 19:00etan hasita. Liburua aurkezteaz gain, taldeari buruzko bideo pare bat emango dituzte. Eta musika taldea izanda, taldearen bospasei abesti kantatuko dituzte,
a capella.