Hasi berriak oholtzara igo nahi ditu Antxoko TOPAguneak
San Fermin egunerako kontzertu maratoia antolatzen ari dira oraindik diskorik atera ez duten taldeekin.
Musika talde berriei aukera bat eskaini nahi die aurtengo sanferminetan TOPAguneak, eta asmo horrekin kontzertu maratoi bat antolatu du San Fermin Egunerako.
Parte hartzeko hainbat baldintza zehaztu dituzte musika taldeei begira, tartean, oraindik diskorik plazaratu ez izana. Horrez gain, euskaraz abesten duten taldeak lehenetsiko dituztela jakinarazi dute.
Modu berean, emakumeen parte hartzea baloratuko dutela aurreratu dute, baita ez zapaltzailea izatea edota izena emateko hurrenkera. Halaber, askotariko musiko estiloak uztartzeko ahalegina egingo dutela aurreratu dute.
Interesdunek hilaren 15era bitarteko epea dute izena emateko. Posta elektronikoz helarazi behar zaie antolatzaileei taldearen deskribapena.
Taldeei, uztailaren 7an TOPAguneko oholtzan jotzeko aukera emateaz gain, ondorengoa eskainiko diete: ekipoa, afaria, eta gastuak.
Irudi berria
Sanferminen atarian TOPAguneak irudia berria aurkeztu du. Logoa aldatu eta iniziatibaren hiru balore nagusien berri eman du: “euskalduna, feminista eta parte hartzailea”.
Zehaztu dutenez “topa egiteko gune bat baino gehiago” izan nahi du TOPAguneak, “jaien erdigunean, jaietako babes puntua” izateko baita ere.
Datozen egunotan aurtengo sanferminetarako ondu duten egitarauaren berri iragarriko dutela jakinarazi dute. 
