Hurbil dira berritasunez betetako santakrutzak

Aurten, aspaldiko partez, su artifizialak berreskuratuko dituzte, baita jubilatuen bazkaria ere bai; hilaren 13tik 16ra bitartean ospatuko dituzte festak

Erik Gartzia Egaña

Lezo

2018/09/04

Val, Arberas eta Martiarena, festen aurkezpenean.

Bederatzi egun besterik ez dira falta santakrutzak hasteko. Lezoko festa nagusiak ekitaldiz beteta datoz —guztira 62 izango dira—. Gaur aurkeztu dituzte festak, eta Jesus Mari Martiarena alkateak azaldu duenez, bost egun beharrean, lau izango dira, Jai Batzordean hala erabakita. Alkateak berak gogorarazi duenez, agintaldiko azken urtean daude, eta horregatik, hainbat ekitaldi berezi antolatu dituzte. Alde batetik, jubilatuen bazkaria berreskuratuko dute, eta, bestetik, su artifizialak. Hori bai, zehaztu du gainontzeko ekitaldiei zuzendutako diru partidei ez diela eragingo. Xanti Valek, bere aldetik, nabarmendu du larunbatean (hilak 15) egingo duten ekitaldi mordoa. 27 izango dira, Baserritarren Egunak indartuko duelako. “Kolore guztietako ekitaldiak izango dira egun horretan: rock kontzertuak, haurrentzako jolasak, herri kirolak…”. Aurten, estreinakoz, arrantzale eta tartekoen bazkariak bat egingo dute. Lezo Herri Eskolako jolastokian izango da. Indarkeria matxistari aurre Noemi Arberas Berdintasun zinegotziak iragarri duenez, indarkeria matxistaren kontrako aldarriarekin bat egingo du udalak, beste urte batez. Panelak jarriko dituzte herrian zehar, eta pankarta bat udaletxean. Horrez gain, ostiralean, 18:00etatik 21:00etara informazio karpa jarriko dute, plazan. “Berdintasunean oinarritutako festak izatea nahi dugu”, desiratu du Arberasek. Bestalde, festen egitaraua bihar —asteazkena— hasiko dira banatzen, etxez etxe. Itxoin ezin duenak, Lezoko Udalaren aplikazioan ikus dezake.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.