Santa Zeziliarako ekimenak antolatu dituzte Ibargainek eta Lartaun Abesbatzak
Ibargaingo ikasleek asteartean egingo dute emanaldia; Lartaunek bi emanaldi antolatu ditu astebururako
Astelehenean, azaroaren 22an, euren eguna ospatuko dute musikariek: Santa Zezilia Eguna. Horren harira, hainbat ekimen antolatu dituzte herriko bi taldek: Ibargain Musika Eskolak eta Lartaun Abesbatzak.
Ibargain Musika Eskolak, hilaren 23ra (asteartera) atzeratu du festa. Musikarien zaintzailea den horren inguruko festa luzatuz, emanaldi berezia antolatu du. 17:45ean egingo dute emanaldia Ibargaingo ikasleek, Aialde kalean eta Doneztebe plazan.
17:45ak aldera musika eskolako ikasleak eta irakasleak eskolako atarian bildu eta kalejiran, Aialde kalean zehar, Doneztebe plazara igoko dira kantari eta soinu-tresnak joaz. Plazara iritsitakoan udaletxearen aurrean abesti ezagunez osatutako kantaldia eskainiko dute. Kantaldia irekia izango da eta hurbildutako guztiak haurrekin eta gazteekin batera kantatzera gonbidatu dituzte.
Plazako saioaren ondoren ikasleek eta irakasleek eskolaranzko bidea hartu eta kantari bukatuko dute eguna.
Emanaldiaren helburua musikarien eguna luzatzea dela jakinarazi dute Ibargaindik. Baina horrez gain, Musika Eskola bera kalera atera nahi dute (batez ere ikasle gazteenak) eta herritarrak eurekin dantzan eta abesten jarri, edozerren gainetik, guztiek ondo pasatzeko.
Egitaraua
Musikariek, Ibargain Musika Eskolatik plazara Epoitaitaye abestia joko dute. Doneztebe plazan,
Ala kinkiri, ala kunkuru abestiaren txanda izango da. Ondoren, Arantxantxan, Zapatalaria eta Gure aitak amari abestiak joko dituzte. Plazatik Musika Eskolara itzuliko dira gero, Epoitaitaye abestiarekin.
Lartaun Abesbatzaren emanaldiak, asteburuan
Lartaun Abesbatzak, aldiz, Santa Zeziliaren ospakizuna aurreratzea erabaki du eta hainbat ekitaldi antolatu ditu asteburu honetarako.
Etzi, 12:30ean, kantu kantari aterako dira abesbatzako kideak Elizaldeko kaleetan zehar. Gogorarazi dutenez, emanaldia, beti bezala, Landetxe plazan hasiko dute.
Etzidamu, igandean, Lartaun Abesbatzak eta Lartaun Txistulari Taldeak kontzertua emango dute. Eguerdian izango da, 12:45ean, Kontzejupean.
