Hondarribia-Marlaxkak irabazi du eta bigarren jarri da xakeko preferentean
Xakeko Lurraldeko Preferente Mailan ari den Hondaribia-Marlaxka Ak garaipen garrantzitsua lortu zuen Zarautzen Iriondoren aurka (0,5-3,5). Emaitza horrekin zarauztarrak aurreratu ez ezik, bigarren tokian zen Urnietarekin berdindu eta lider Eibarrengandik puntu erdi batera jarri dira hondarribiarrak —Eibarrek 13,5 puntu ditu eta Marlaxka Ak 13—. Maila guztietatik preferentea da momentuz lehiatuena, lehenaren eta zapigarren taldearen artean 3,5 puntuko aldea besterik ez baitago.
Larunbatean lehen postua jokoan izango dute Marlaxkako lehen taldekoek; etxean jokatuko dute seigarrenaren kontra eta Eibarrek eta Urnietak elkarrekin jokatuko dute. Liderrak sailkapeneko hirugarrenaren kontra punturen bat galduz gero Hondarribiko taldeak lehen postua lor dezake, beti ere Mundarrorekin etxeko lanak egiten baditu.
Gainontzeko mailetan jokatzen duten herriko taldeen emaitzetan denetarik izan zen. Lehen Mailan Marlaxka Bk Oreretan galdu zuen Beraun Berarekin (3-1) eta atzerapausua eman du sailkapenean, zazpigarren posturaino, 10,5 puntu pilatuta. Datorren asteburuan aurkari zuzen baten kontra lehiatuko dira Kasino Zaharrean, Arrasate-Arlutzekin; zortzigarren dira arrasatearrak.
Bigarren Mailan, Marlaxka Ck ezin izan zuen etxean Astigarragako Mundarro garaitu eta lider Gros Gtik 4 puntu eta erdira jarri dira, laugarren tokian. Hain zuzen ere, lehen postuan den Gros Gren etxean jokatuko du Marlaxka Ck heldu den asteburuaqn.
Eta azkenik, Lurraldeko Hirugarren Mailako ligaxkako azken jardunaldian Marlaxka Dk bere partida irabazi zuen Donostian, Fortuna Dren kontra (1-3) eta aurreko jardunaldian lortutako bigarren postuari eutsi dio. Denek denen kontra jokatu eta gero, Gros Ik amaitu du lidergoan, 16 punturekin. Hondarribiko ordezkariak 13 puntu pilatu ditu eta bigarren geratu da.Horrenbestez, igoerako kanporaketa jokatzeko aukera izango dute hondarribiarrek.
