Sasoi ona erakutsi dute hondarribiarrek Kantabrian
Ama Guadalupekoak denbora onena egin zuen larunbat arratsaldean El Astilleron (Kantabria, Espainia) egin zen estropadan, baina ezin izan zuen San Jose bandera etxera ekarri, aulki mugikorreko ontzia kanporatu zutelako, lehen postuan zihoala ibilbidetik irten zelako. Izan ere, proba mistoa da El Astillerokoa, traineruen eta 8+en jardunak uztartzen dituena. Modalitate bakoitzak bere sailkapen propioa du, baina bietan parte hartu behar du bandera irabazi nahi duenak. Parte hartu baita bukatu ere.
Parte hartzaileek lehenik igoera proba egin zuten, 4 kilometro aulki mugikorreko ontziek eta bost kilometrokoa traineruek, ziaboga batekin. Ondoren, sprint txapelketa, 500 metroetan, aulki mugikorrekoek eta traineruen igoeran sailkatutako lehen hirurek. Hondarribia Arraun Elkarteak traineruen igoera eta bi sprintak irabazi zituen, baina konbinatuaren garaipena eta bandera Bermeorentzat izan zen, haiena izan baitzen 8+en igoera bukatu zuen bakarra —Hondarribiako bezala etxeko ontzia ere kanporatu zuten epaileek—.
Gertatutakoa gertatuta, ez zen polemikarik egon, hondarribiarrek egindako akatsa onartu zutelako. Nolanahi ere, pozik zeuden berdeak, traineruarekin nagusitasun handia erakutsi zutelako: igoeran hamar segundu atera zizkioten Bermeori eta hamahiru Astillerori, eta kilometro erdiko proba azkarrean ere azkarrenak izan ziren, etxeko ontziari zein Bermeokoari bosna segundu ateraz.
San Jose igoeran sailkatu ziren lehen bost traineruak aurkari izango ditu Hondarribiak San Miguel Ligan eta, momentuz, sasoi onean dagoela erakutsi du Ama Guadalupekoak aurredenboraldiko probetan. Hondarribiko jaitsieran bigarren geratu zen Orioren atzetik, Orion irabazi zuen etxekoen ontziaren eta San Pedroren aurretik —Hondarribian ere hirugarren izan zen San Pedro—, eta Astilleron indartsuena izan dira Orbañasosen mutilak. Hori bai, Orioko eta Pasaiako traineruak ez ziren Astillerora joan eta ontzi batzurekin oraindik ez da lehiatu Hondarribiko lehen ontzia, haien artean, Kaikurekin eta Tiranekin.
Astilleroko igoera. Sailkapena
Igoera. Aulki mugikorra
- Bermeo 12.38.74
Hondarribia eta Asillero kanporatuta.
Igoera. Traineruak
- Hondarribia 16.48.88
- Bermeo 16.57.71
- Astillero 17.00.12
- Castro 17.06.82
- Pedreña 17.10.36
- Camargo 17.34.56
- Arraun 17.41.32
- Santurce 17.46.07
- Hoindarribia B 17.59.33
- Mundaka 18.07.64
- Raspas 18.16.19
- Santander 18.39.90
- Colindres 18.58.08
- Luanco 18.59.23
Sprinta. Aulki mugikorra
- Hondarribia 1.19.24
- Astillero 1.24.05
- Bermeo 1.24.86
Sprinta. Traineruak
- Hondarribia 1.26.38
- Astillero 1.27.12
- Bermeo 1.27.92
