Ion Areitio: "Ez dut nahi adina entrenatu baina maila onean iritsiko naiz Poloniara"
Euskadiko Txapelketako lehen proba irabazi du Ion Areitio hondarribarrak, Irungo Puiana auzoan, eta ia atsedenik hartu gabe maleta prestatu behar du Poloniara joateko, asteburuan Walbrzych herrian egingo duten Munduko Kopako bigarren proban parte hartzeko.
Zer iruditu zitzaizun Puianako ibilbidea?
Beno, lehenik eta behin esan beharra daukat Irungo Txirrindulari Elkartearen eta gure artean diseinatutako zirkuitua dela, beraz perfektua da niretzat —barre egiten du—. Egia esan oso ondo prestaturik dago, adin maila guztientzat erabilgarria delako.
Zu zeu, zer moduz moldatu zinen?
Lehen bi itzulietan nahiko ondo moldatu nintzen. Baina aurreko egunetan egindako euriak lokatza asko metatu zuen eta nahiko zaildu zituen eremuak. Hori dela eta hirugarren itzualian oso irristakor jarri zen zirkuitua eta ibilbidea asko zaildu zitzaigun.
Datorren asteburuan Poloniara zoaz? Zer moduz zaude sasoiz eta zein izango da zure helburua bertan?
Ostegunean abiatuko naiz Poloniara eta bertan larunbatean eta igandean lehiatuko nahiz. Bigarren Munduko Kopa izango da honako hau.
Azkeneko asteetan nahiko zaila izan da entrenatzea eguraldiaren erruz, ez dut nahi adina entrenatu, baina nik uste maila onean iritsiko naizela. Helburu nagusia superfinalean sartzea da —lehen laurak sartzen dira—, baina ez da batere erraza izango. Gainera badirudi eguraldia ez dugula lagun izango.
