Bihotz-biriken suspertze teknika erakutsiko dute igandean Portuan
Gipuzkoako DYA erakundeak bihotz-biriken suspertze teknikak (BBS, RCP gazteleraz) erakutsiko ditu Hondarribian etzi, igandearekin. Bihar BBS Eguna ospatuko dute lurralde osoan eta, horren harira, erreanimazioaren oinarrizko mugimenduak erakusteko postuak jarriko dituzte gaurtik igandera hainbat herritan. Hondarribian igandean izango dira DYAkoak, San Pedro kalean, 10:00etatik 13:00etara.
Kanpaina honen bidez bihotz-biriken geldialdi baten aurrean jokatzen jakitea zein garrantzitsua den erakutsi nahi du DYAK: “Hainbat ikerketek erakusten duten bezala, bihotz gelditze baten osteko lehen bost minututan jokatuz, pertsonaren biziraupena %70era igotzen da. BBS teknika oso erraza da. Asimilatzeko hamar minutu soilik dira beharrezkoak, aurretiko osasun formaziorik izan gabe, eta edozein adineko pertsonak egin dezake”.
Hala, igandean edozeinek ikas dezake bihotz-biriken suspertze teknika egiten. Jarduera erabat dohainekoa izango da.
