Etxebizitza hutsen gaineko errekargua bertan behera
Etxebizitzen kuotari %150eko errekargua ezartzea onartu zuen Udalbatzak, hutsik zeudenen kasuan, joan den urteko irailean. Herenegun egindako oso bilkuran erabaki hori indargabetzea onartu zuen Udalbatzak, Bilduren aldeko bozkekin. EAJko zinegotziek kontra bozkatu zuten, eta PSE-EEkoak abstentzioaren alde egin zuen. Bilduk eraman zuen erabakia indargabetzeko proposamena asteazkeneko plenora: “Ordenantza indarrean zegoela, apirilean idatziak bidali genizkien errekargu xede ziren zergadunei, eta alegazioak aurkezteko 15 eguneko epea eman zitzaien”. Emandako epe horretan 90 alegazio jaso ditu udalak. Erreklamazio guztiak aztertuta, gainera, Ondasun Higiezinen Zerga (OHZ) igota Lezon hutsik dauden etxebizitzak merkatura ateratzea ez dela lortuko ondorioztatu du koalizioak, “zerga errekarguaren helburu nagusia etxe horiek merkatura ateratzea bazen ere, Lezon huts moduan jo ditugu etxebizitza asko, hainbat arrazoirengatik, ez dira merkatuan jarriko”.
Banan-banan aztertu behar
Horrenbestez, Ondasun Higiezinen Zerga igoera kobratzeko erabakia atzeratzea onartu du Udalbatzak, “kasuistika zabal hori islatuko lukeen ordenantza osatuago bat egin arte, kasu bakoitza banan-banan aztertuta”.
EAJk proposamenaren kontra egin zuen, “hankamotz” gelditzen zela iritzita. Alderdi jeltzaleko Kepa Garbizuk OHZko artikulu guztiak indargabetzea eta duela bi urteko ordenantza aplikatzea eskatu zuen: “Grabamena 0,495ekoa da. Lezoarrok zerga altuagoak ordaintzen ditugu Oarsoaldeko beste herrietan eta Donostian baino”.
PSE-EEko Mikel Antxon Arrizabalagaren ustez, udalari “beldurra” eman dio proposamena aurrera ateratzea, eta “kontraesakor” jokatzea leporatu zion Bilduri.
Onkologikoa Osakidetzan
Onkologikoaren gainean bi mozio aztertu zituen, halaber, udalbatzak asteazkenean. Bilduk aurkeztutakoa landu zuten lehenik, eta mozio horrek egin zuen aurrera koalizioaren eta PSE-EEren aldeko bozkekin. Onkologikoaren eta bertako langileen aitortza egin zuen Udalbatzak. Horrekin batera, osasun publikoaren sisteman sartzeko eta Eusko Jaurlaritzari eta Kutxako zuzendariei Onkologikoak biziraupenerako behar duen diru hornidura bermatzeko eskatu zuen.
Herri kurduarekin elkartasunezko mozioa onartu zuen, bestalde, Udalbatzak EAJ eta Bilduren aldeko bozkekin. Alderdi jeltzaleak aurkeztu zuen mozioa. Sakine Cansiz, Fidan Dogan eta Leyla Soylemez ekintzaile abertzale kurduen hilketa gaitzestearekin batera, Turkikao Gobernuari errepresio bidea utzi eta Kurdu talde armatuei indarekeria geldiaratzeko eskatu zuten meozioan. Halaber, Turkia Europako Batasuneko kide izatea eskatu duela eta integrazio prozesurik abian jarri ez dadila eskatu diote EBri, “gatazka kurdua demokratikoki konpontzen ez den bitartean, eta kurduen eskubide demokratikoak, kulturaklak eta linguistikoak errespetatzen ez diren arte”.
Mozioaren harira eskaera egin zuen Bilduk beste bi puntu txertatzeko. Batean Frantziako Gobernuari “hiru ekintzaileen hilketa argitzeko” bideak jartzeko, eskatzen zuen. Bigarrenean, Turkiako Gobernuari “Kurdistango preso politikoen eskubide politiko eta zibilak errespetatzea eskatzeko” galdegin zuen.
