Errenteriako emakumea berez hil dela esan du behin-behinean autopsiak
40 urteko emakume bat hil da Donostia ospitalean, atzo arratsaldean hainbat kolpe zituela erietxeratu eta gero. Ertzaintzak bikotekidea atxilotu du, baina ez du adierazpenik egingo autopsiaren emaitzak jakin arte. Elkarretaratzea deituta zeukan 19:30erako Errenteriako Udalak, baina OARSO BIDASOKO HITZA-ri jakinarazi dionez, bertan behera utzi du.
Autopsiak behin-behinean Errenteria-Oreretako emakumea berez hil dela ondorioztatu du, eta hori jakinarazi dio Segurtasun Sailak Errenteriako Udalari. Horrenbestez, bertan behera utzi ditu zerbait gehiago jakin bitartean, arratsalderako deitutako ezohiko udalbatzarra eta elkarretaratzea.
Genero indarkeria izan daitekeelakoan deitu ditu ezohiko udalbatzarra eta elkarretaratzea, baina autopsiaren behin-behineko emaitza jakin ondoren, bertan behera utzi ditu.
Errenteria-Oreretako Beraun auzoko 40 urteko emakume bat hil da Donostia ospitalean, atzo arratsaldean hainbat kolpe zituela erietxeratu eta gero. Ubeldu ugari zituen aurpegian eta gorputzean, eta buruan ere kolpe bat zuen, Ertzaintzaren arabera.
Ertzaintza ikertzen ari da gertatutakoa, argitzeko emakumearen bikotekideak zerikusirik ote duen andrearen heriotzarekin. Ertzaintzak OARSO BIDASOKO HITZAri jakinarazi dionez, atxilotua eraman dute, baina ez diote galdeketarik egingo autopsiaren emaitza jakin bitartean. Autopsiaren emaitzak “lehenbailehen” jakinaraztea espero du.
Atzo 14:15 aldera jakinarazi zion ospitaleak Ertzaintzari emakume bat larri zaurituta eraman zutela erietxera. Sendagileen arabera, zauriak eraso batean eginikoak izan zitezkeen, eta genero indarkeriaren kasuetarako protokoloa jarri zuten martxan.
Atzo arratsean atxilotu zuten andrearen bikotekidea, eta erietxeak gaur 10:30ean jakinarazi dio Ertzaintzari emakumea hil egin dela.
Udala: “Horrelako gertaerak ez ditugu onartzen”
Errenteriako Udalak, indarkeria matxista izan dela konfirmatuz gero horrelako gertaerak ez dituela onartzen adierazi du. Era berean, herritar guztiei dei egin die gaurko elkarretaratzera —19:30ean Herriko Plazan— joateko. Oiartzungo Udalak ere bat egin du gaurko mobilizazioekin.
