Eragozpenak trafikoan eta aldaketak autobus zerbitzuan, jaialdiagatik
Hondarribia Blues Jaialdia dela eta, gaurtik eta igandera bitartean ezingo da Zuloaga kalean aparkatu, eta bihar, larunbata, eta etzi, igandea, kalea oinezkoentzat soilik egongo da irekita. Hori horrela, Higer merkataritza elkarteak eta herriko artisauek azoka antolatuko dute asteburuan.
Trafiko mozketak autobusei ere eragingo die gaur 15:30etik hasita. E20 (Hondarribia-Errenteria-Pasaia-Donostia), E27 (Hondarribia-Irun-Errenteria-Pasaia-Donostia) y E25 (Hondarribia-Irun) autobusei eragingo die. “Egunean zehar Hondarribitik ateratzeko geltokia Foru kalean egongo da. Foru kaleko geltoki horretatik eskuinera egingo da bira, gero Mourlane Mitxelenatik jarraitzeko, Sokoako biribilgunera iristeko, eta bertatik ezkerretara bira egiteko, Donostia kaletik; bertan geldiunea egingo da eskailera mekanikoen parean. Hortik ibilbideak Soroeta kaletik jarraituko du, eta beste geldiune bat egingo du 6 zenbakian (Eguzki Lore etxea). Ondoren Santa Engraziarantz jarraituko du, gero ohiko ibilbidearekin jarraitzeko”, azaldu dute udaletik.
Halaber, Irunera bidean lau geltoki gutxiago izango ditu ibilbideak: Itsasargi kalea, Bernat Etxepare (Korreos), Sabin Arana (San Jose Eskola) eta Zumardikoa.
Gauez autobus gehiago
Bestela, kontzertuetara datozenentzat Ekialdebusek gaueko zerbitzua indartu du, bai Hondarribia Irunekin lotzen duen E78 linea zein Gipuzkoako hiriburuarekin duen E77 linea, Irun, Errenteria eta Pasaiatik igarotzen dena. Gaueko zerbitzuaren ordutegi zehatzak ezagutzeko bisitatu ekialdebus.net webgunea.
