Munduko txapelketako lehen finalista erabakiko da bihar Jostaldin

hondarribiko hitza

Oarsoaldea

2013/07/18

Gorriak aurretik izan ziren partidaren hasieratik

Aritz Erkiaga eta Txasio izan dira Munduko Pilota Biltzarrak antolatzen duen Binanako Txapelketatik kanporatuta geratu diren lehen bi pilotariak. Ligaxkako lehen partida galdu eta gero, ostiralean nahi eta ez irabazi behar zuten ligaxkako bi lehenen artean geratu nahi bazuten. Ez zuten lan erraza izango, jarduneko munduko txapelduna den Egiguren II-a zelako aurkaria, Enbilekin batera. Bi hauentzat lehen partida zen ligaxkan eta ez zuten hutsik egin, 35-27 emaitzarekin nagusituz. Egiguren II-Enbil biko gorriak lehiaren hasiera-hasieratik hartu zuen aurrea markagailuan. 7-4ko partzialetik 12-4kora pasatu ziren eta bikote urdinak erasora jotzea erabaki behar izan zuen. Partidako alderik handiena hamaika tantokoa izan zen (18-7). Hortik aurrera, Egigurenek eta Enbilek partida koltrolpean eduki zuten. Erkiaga-Txasio gerturatu ziren markagailuan, bost tantora hurbildu ere, baina inoiz ez zuten arriskuan jarri debutarien garaipena. Bihar amaituko da ligaxka

Paella dastaketaren une bat

Bihar erabakiko dira ligaxkako lehen bi postuak, orain arte galdu gabe dauden bi bikoteen arteko partidarekin. 20:00etan hasiko da jaialdia baina txapelketako partida jaialdiko bigarrena izango da. Ligaxka lehen postuan bukatzen duen bikotea uztailaren 26an Jostaldin jokatuko den finala jokatzeko zuzenean sailkatuko da. Bigarrena, berriz, Beaskoetxea-Irastorzaren kontra jokatuko du finalerdia. Gernikan izango da final ataria, hilaren 22an. Joan den ostiralean jende asko hurbildu zen Jostaldira, lehen jardunaldian baino gehiago. Jai Alive enpresa antolatzailetik uste dute aste honetakoa izango dela orain arteko sarrerarik onena, txapelketako partidan ligaxkako lehen bi postuak daudelako jokoan. Udako jaialdi guztietan bezala, sarrerak 12 euro balioko du eta prezio barruan sartuko da paella eta ardo dastaketa. Jaialdiko bi partiden artean izaten da gastronomia dastaketa.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.