Adierazpena landu, pintura eta buztina baliatuz
Hezkuntza sortzailea landuko dute Errenteria-Oreretan ikasturte honetan zehar. Horretarako pintura eta buztinaz baliatuko dira. Elementu hori baliatuz, espresioa lantzea da asmoa, inork gidatu edo epaitu gabe: “Ez dugu irakasten nola egin, ez dugu proposatzen zer egin”, zehaztu du Tallerra antolatzaileak.
Asmoa “nork bere izatetik ikertzen, deskubritzen, zeharkatzen, ikasten edota jolastea” dela gaineratu du, “inolako eredurik eta jarraitu gabeko egitaraurik gabe”.
90 minutuko tailerra izango da, eta astean behin egingo dute, Tomas Lopez kaleko txokoan. Hainbat ordutan egiteko aukera dago. Pintura asteartetan 17:30ean eta asteazkenetan 10:30ean eta 17:30ean. Buztina, berriz, astelehen eta ostegunetan 17:30ean.
Hezkuntza sortzailea kontzeptuaren atzean Arno Stern dago. “Bigarren Mundu Gerra amaitu zenean, errefuxiatu zentro batean lanean aritu zen umezurtzak zaintzen. Margo batzuk eskuratu zituen eta bertako haurrei eskaini zizkien. Haur hauen egoerak hobera egin zuen. Gustuko zuten margotzea. Arnok inolako nozio artistikorik ez bazuen ere haurren marrazkietan elementu bertsuak errepikatzen zirela ikusi zuen. Elementu hauek unibertsalak ote ziren edota haur horiek bizi zuten egoeraren isla ziren ikustea izan zen bere ikerketaren funtsa”, azaldu du tailerraren antolatzaileak.
