PSE-EEk batzordea eskatu du, aldundiarekin egindako hitzarmena aztertzeko
Pasaiako PSE-EEk batzorde bat eratzea eskatu du, Gipuzkoako Foru Aldundiaren eta udalaren arteko hitzarmena aztertzeko. Sozialisten esanetan, hitzarmenean bi milioi euro gutxiago daude. “%50 murriztea suposatzen du horrek”, gaineratu dute.
“Ez dakigu zergatik eta nola eman den jaitsiera hori. Gainera, ez dakigu zein eragin izango duen programazio, exekuzio eta aurrekontu arloetan. Horregatik, udaleko talde politikoak informatzea premiazkoa dela uste dugu”, esan dute. Eurek informaziorik jaso ez dutela jakinarazi dute.
Horrela, 2008an sinatutako hitzarmena “osoki” betetzeko eskatu diote Bilduri, eta Pasaiaren interesak defendatzeko.
Ezker Anitza, harrituta
Pasaiako Ezker Anitzak, bere aldetik, sozialisten proposamenak eragindako “harridura eta ezinegona” adierazi du prentsa ohar batean. “PSE-EEk eskubide osoa du batzordea sortzea eskatzeko, baina gutxieneko koherentzia bat eskatzen diegu, hitzetan eta ekintzetan”, esan du Xabier Pombo zinegotziak.
Gogorarazi duenez, “PSE-EE izan zen 2011n EAJrekin foru aurrekontuak adostu zituena. Bertan Pasaiari bideratutako 1.300.000 euro Donostialdeko Metroari ematea hitzartu zuten. Proiektu hori PSE-EEren eskuetan zegoen Eusko Jaurlaritzak finanzatu behar zuen. Gainera, beste diru partida bat Errenteriako Beraun auzoko igerilekuak finantzatzeko bideratu zuten, bertako udalaren kudeaketa txarra estaltzeko”.
Horrela, sozialistei bere ardura onartzeko eskatu diete, eta Pasaiaren defendatzaile bakar agertu ez dadila: “Euren ekintzek kontrakoa adierazen dute”.
