Urtarriletik aurrera taxibusak zerbitzu bat gehiago eskainiko du
Gaur egungo ordutegiari beste bat gehituko diote. Urrian 406 erabiltzaile izan zituen.
Hala, urtarriletik aurrera eguneko azken bidaia 20:00etan aterako da Doneztebe plazatik (gaur egun 18:30ean izaten da). Beste ordutegiak mantendu egingo dira; beraz, bederatzi zerbitzu eskainiko ditu taxibusak: 07:20; 08:15; 10:00; 12:00; 13:00; 14:00; 17:00; 18:30 eta 20:00etan. Horiek guztiak Doneztebe plazatik ateratzen direnak dira.
Bestalde, udalak taxibus zerbitzuaren erabilera neurtu du urrian eta 406 erabiltzaile izan dituela jakinarazi du, egunean 20 bidaiari bataz beste. Izan ere, 21:00etako bidaia kendu dute eta 10:00etakoa jarri, eta horrek izan duen erantzuna jakin nahi izan du udalak, baita bestelako garraio publikorik heltzen ez den auzoetako garraioak nolako erabilera izan duen ere.
Xorrolak 7.025 bidaiari
Xorrolaren erabiltzaile kopurua ere neurtu dute eta urrian 7.025 bidaiari izan dituela azaldu du udalak, “sekula izan duen erabiltzaile kopuru altuena”. Horietatik %75ek Mugi txartelarekin ordaindu dute zerbitzua (50 zentimo) eta besteek txartel arrunta erosi dute (60 zentimo).
Udalak Xorrolan ere Mugi txartela sustatu nahi du, “txartel bakarra erabiltzea erosoa izateaz gain, onura ekonomikoak dakarzkie herritarrei”. Oraingoz 52.000 erabiltzaile baino gehiago izan ditu aurten.
