Bigarren itzulia bigarren postuan hasiko du La Bacaladerak
Amaitu da eskubaloiko Euskal Ligako lehen itzulia eta ezinhobe amaitu da La Bacaladera Hondarribia taldearentzat. Azken jardunaldian Corazonistasen kantxan irabazi zuen Viki de la Hazaren taldeak (23-32) eta bigarren jarri da, Soralucek Errenteria-Oreretan Ereintzaren kontra galdu baitzuen. Duela hamabi hilabete oso bestelako egoeran zeuden hondarribiarrak.
Aurreko denboraldian bezala, liga hasiera zaila izan du La Bacaladerak, multzoko lau talde indartsuenen etxean jokatu behar izan zutelako. Baina aurten emaitza hobeak lortu ditu, Usurbil, Soraluce eta Amenabarren kontra berdinduz eta Erandiorekin gol bakarrez galduz. Horri beste bi gauza gehitu behar zaizkio. Batetik, etxeko sendotasuna, Hondartzan jokatutako partida guztiak irabazi baititu. Eta bestetik, ate azpiko lana, gol gutxien jaso duen taldea delako eta partida gehienetan 25 gol baino gutxiago jasotzen dituelako. Erasorako falta zaion altuera ordezkatzen du atezainen lanarekin.
Bigarren itzulia Urdulizen kontra hasiko du La Bacaladerak. Zazpigarren tokian daude bizkaitarrak baina lehen itzulian 26-25 irabazi zioten Hondarribiko taldeari. Bigarren partidan hamargarrenaren kontra jokatu beharko dute De la Hazaren mutilek eta ondoren hasiko dira talde nagusien kontrako partidak. Otsailean eta martxoan sailkapeneko lau aurkari indartsuenak hartuko dituzte Hondartza kiroldegian. Lau lehia horiek eta gero egutegia leunduko zaio Hondarribiari, baina Euskal Ligan edozeinek irabazi dezake edozeinen kontra.
