Aitor Kerejeta: “Ados jarri gaitezen luzerako konponbide batean”

asier perez-karkamo

Oarsoaldea

2014/02/05

Okerren dauden errepide zatiak barruragotik joatea proposatu du alkateak

Bihar, ostegunean, aurreko asteburuko denboraleak gogorren astindutako Gipuzkoako bederatzi udalerrietako alkateak bilduko dira aldundiko arduradunekin. Kalteak zenbaterainokoak izan diren aztertu eta neurriak hartzeko egingo dute bilera. Aitor Kerejeta alkatea bertan izango da, Hondarribian izandako kalteak mahai gainean jartzeko. Butroi pasealekuan olatuek puskaturiko petril zatiez gain, batez ere, farolako errepidearekin zer egin aztertu beharko dute. Euritearen eraginez errepidearen zati bat erori da, oso zati handia, errepidearen zabalera osoa hartzen duena. Konponbidea ez da erraza izango eta baliteke urte osoan errepidea berriro ez ireki ahal izatea. Dagoeneko urteko bigarren luizia izan da eta, horregatik, hartzen den konponbidea “luzerako” izan behar dela uste du alkateak eta hori defendatuko du biharko bileran, baita heldu den astean lau erakundeen artean egingo duten hitzorduan ere. Atzo, asteburuan eroritako zatia ikusten egon zen alkatea Martin Garitano Ahaldun Nagusiarekin eta errepidea barrurago sartzeko beharra azaldu zion Garitanori. “Saiatuko gara lau erakundeen artean akordio batera iristen. Ahaldun Nagusiari luzatu diodan ideia honakoa da, edozein konponketa egin baino lehen, ados jarri gaitezen luzerako izango den konponbide batean. Ideia da errepide hau ez mantentzea hemen, ahalko balitz mendia jan eta ertzean ez egotea. Azken urteetan aldundiak obra ikaragarriak egin ditu hemen eta dirutza handia gastatu du, baina ez dut uste hori etorkizuneko konponbidea denik. Ahala bada, errepidearen tokia aldatzen saiatuko gara”. Luizia izaten den aldiro aipatzen den proposamena da, baina lur-jausiak ugaritu dira eta proposamen hori beharra bilakatu dela uste du Kerejetak: “Errepidea ertzean dago eta arriskua handiena duten tarteetan mendia jan beharko litzateke, hemen ikusten delako zer dagoen. Batetik trafikoa da eta bestetik urak nondik jasotzen diren. Oinezkoentzat eta bizikletentzat egokia da hau, baina kotxe eta kamioientzat askoz hobe barruragotik joatea. Jakin badakigu hau itsas-labarra dela, eta bizirik dagoela, eta pixkanaka-pixkanaka erortzen joango dela, baina arriskua ahalik eta murritzena izatea da helburua. Teknikoki ikertu beharko dute nola egin”. Bitartean, luizi gehiago gertatuz gero Ramon Iribarren pasealekuko bizilagunak babesteko neurriak hartu behar direla gaineratu du Kerejetak: “Konponbideak bi alde ditu, errepidearekin zer egin eta paretarekin, pareta ere erortzen jarraituko delako. Horregatik da garrantzitsua lau erakundeen artean konponbideez hitz egitea, pareta zeinena den eztabaidatzeak ez garamatzalako inora. Goazen eztabaida historiko hori alde batera uztera eta elkarrekin laguntzera”. Errepidea bezala, pareta luzea da eta dena egoera berean ez dagoela aitortu du Hondarribiko alkateak. Horregatik, lanak epeka egin daitezkeela uste du eta hori nola egin teknikoek esan beharko dutela: “Pareta oso luzea da eta dena ez dago egoera berean. Pusketa batzuk arrisku handiago dute eta beste batzuk gutxiago. Teknikariek esango digute epeka nola egin daitekeen eta zein puntutan hasi behar garen”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.

Aitor Kerejeta: “Ados jarri gaitezen luzerako konponbide batean”

Gipuzkoa

Maixabel Lasari emango diote aurten Gipuzkoako Urrezko Domina

Hondarribiko Udalak kereila penal bat aurkeztu du Zaldunborda auziko dokumentazioa iker dadin

Xabier Morras, margoz emandako lekukotasuna

Yurrita e Hijoseko hamabi langile kaleratu dituztela salatu dute

Jarindo parke eolikoa egiteari uko egin dio Green Capital Powerrek

Bergarako eta Zarauzko IATetako lan gatazkan esku hartu dezala eskatu diote Jaurlaritzari

‘Superra’-ren aurrestreinaldia Azpeitian egingo dute, hilaren 28an

Xabi Alonsoren Igeldoko txaleta legezkoa dela ebatzi du EAEko Auzitegi Nagusiak

Irungo atxilotuen kasua «Poliziaren jukutriatzat» jo du Askek

Eusko Jaurlaritzak Bentaberriko babes ofizialeko 510 etxebizitzak erosiko dizkio Blackstone funtsari

Jon Insaustik esan du Donostian atzo etxegabetu behar zuten familiari «bizitoki bat» eskainiko diotela

Donostiako Antondegi eremuak landa izaerari eutsi behar diola defendatu du Antondegi Berdeak

Gipuzkoako baso suhiltzaileek salatu dute foru aldundiak zenbait zerbitzu eten dituela, baso suteen «arrisku handiko» sasoi betean