Udalak banatutako materiala ez erabiltzeko deia egin du Pasaia Garbiak
“Atez ateko sistema errefusatzeko neurri gisa”, udalak banatutako materiala ez erabili eta zintzilikarioen azpialdean uzteko deia zabaldu du Pasaia Garbiak, beti ere, herritarrei hondakinak berezi dezatela eskatuz, “birziklatzearen alde daudela frogatzeko modu gisa”.
“Gezurretan” aritzea leporatu dio atez atekoaren kontrako plataformak Amaia Agirregabiria alkateari, helburua gehiago birziklatzea balitz, plataformaren ustez, bosgarren edukiontziaren aldeko apustua egin beharko lukeelako. “Bosgarren edukiontziak eraginkorragoa izatea frogatu du”, diote plataformako kideek.
Alkatea eta Zero zabor taldeak “zirikatzen” dabiltzala salatu, “pasaitarrak banatzeko asmoz”. “Alde batetik, birziklatzearen aldekoak eta bestetik birziklatzearen kontra daudenak, nahiz eta gure plataforma sekula ez duen birziklatzearen kontrako jarrerarik adierazi”, kexatu dira. “Manipulazioak, eta batez ere gezurrak, bazterrean uzteko eskatu diete. “Pasaia Garbia bosgarren edukiontziaren bidez birziklatzearen aldeko apustua egiten du”, nabarmendu dute. Plataformaren iritziz, alkateak eta Pasaia Zero Zaborrek herritarrak nahastu nahi ditu, herritarren gehiengoak nahi ez duen hondakinak biltzeko sistema inposatzeko”.
