Fanderiako arrapalarako egitasmo berria "urrats handia" da Eguzkirentzat
Nahiz eta Fanderiako arrapalarentzako egitasmo berriak Eguzki ekologia taldeak eskatzen zuen guztia ez bete, taldeak esan du “urrats handia” dela, “bioaniztasunari dagokionez eskatzen genituen helburuak lortzeko urrats handia dela aitortu nahi dugu”. Taldeak argi du bioaniztasunaren berreskurapena eta defentsa bilatu behar dituela bertako egitasmoak, eta helburu horiek betetzen dituen alternatiba bat lantzen bada, horren kontra ez duela egingo esan du. Hala, aurreko egitasmoaren eta berriaren arteko aldea nabarmena dela uste du Eguzkik, “batek izokin eta aingirei bidea errazten die, besteak oztopatu”.
Eta Arrapala horren gaineko eztabaida eremu politikotik ateratzeko eskatu du. Zentzu horretan, berriki Errenteria-Oreretako PSE-EEk esan zuen presa berregiteko aurreko egitasmoaren inguruko adostasuna erabatekoa zela, eta horren harira Eguzkik berretsi du hori ez zela horrela, “hasieratik hainbat eragile eta instituzio azaldu ginen uholdeek botatako Fanderiako presa zegoen bezala berregitearen aurka. Adostasun ahalik eta zabalena lortzeko errealitate hori ezkutatzeak ez du laguntzen. Zer da jarrera horrekin bilatzen duena?”.
Eguzkik presaren harira izan duen jarrera, beste talde politiko eta eragileei ere eskatu die, “eta proiektuak duen eragina aztertu ondoren ez badira helburuak betetzen, neurri berriak aztertzeko prestutasuna azaltzea eskatzen dugu”. Hori horrela, behar eta interes guztiak aseko dituen konponbidea badagoela uste du ekologia taldeak, “interes orokorraren alde jar ditzagun denen ahaleginak”.
