Igoera fasea jokatzeko aukera eskura du La Bacaladerak
Etxeko lanak egin ditu asteburuan Euskal Ligako La Bacaladera Hondarribia eskubaloi taldeak. Larunbat arratsean Ereintzaren kontra erraz nagusitu ziren (33-20) eta igoera fasea jokatzeko aukera ematen duen bigarren postuari eutsi diote. Gainera, Zarautzek liderrarekin berdindu zuen eta sailkapenean orain puntu bat aurretik dira hondarribiarrak.
Bi partida baino ez dira geratzen liga erregularra amaitzeko. Horietan, Amenabarrek baino puntu bat gutxiago lortu behar du La Bacaladerak, hau da, zarauztarrek biak irabaziz gero, Hondarribiko taldeak bat irabazi eta beste bat berdintzearekin nahikoa luke. Gauza bera Urdulizekin dena irabaziko balu. Bi partida gehiago falta zaizkie bizkaitarrei eta lauak irabazita —eta La Bacaladerak hiru puntu lortuta—, 35 puntura berdinduko lukete, eta Amenabarrekin bezala Urdulizekin ere average-a alde dute hondarribiarrek.
Nolanahi ere, geratzen zaizkion bi partidak irabazten saiatu behar da La Bacaladera Hondarribia, igoera fasea jokatu nahi badu komeni zaiolako liga erregularra indartsu eta konfiantzaz bukatzea. Izan ere, Espainiako Lehen Mailara igotzeko kanporaketan Euskal Ligako azken bi partidetan izango dituen aurkariak baino zailagoak izango ditu aurrean.
Euskal Liga. Lehen postuak
- Aluminio Ucin Usurbil. 42 puntu.
- La Bacaladera Hondarribia. 32 puntu.
- Zarautz Amenabar. 31 puntu.
- Urduliz. 27 puntu. **
- Erandio. 25 puntu. *
- Gure Auzune. 25 puntu.
