500.000 euro non inbertitu erabakiko dute Oarsoaldeko biztanleek
Gipuzkoako Foru Aldundia partaidetza prozesua egiten ari da, herritarrek, diru publikoa zertan inbertitu erabaki dezaten. Horren harira, 500.000 euro non inbertitu nahi dituzten erabakitzeko aukera izango dute Oarsoaldeko biztanleek. Maiatzaren 18ra bitartean izango dute proposamenak egiteko epea, horretarako. Internet bidez egin daitezke proposamenak edo maiatzean zehar egingo diren partaidetza tailerretan.
Partaidetzazko aurrekontuak ekimenak lau epetan egingo dituzte. Lehenengoan, proposamenak bilduko dituzte. Lezo, Errenteria-Orereta, Oiartzun eta Pasaiako bizilagunek esku orriak jasoko dituzte horretarako etxeetako postontzietan. Oarsoalderako onuragarriak diren egitasmoak proposatu beharko dituzte hortik aurrera eta herrietan zehar jarritako postontzietan utzi ondoren. Lezon, udaletxean, osasun zentroan, liburutegian, Pasaia-Lezo Lizeoan, kiroldegian, Lezo Herri Eskolan eta Altamirako Auzo Elkartean jarri dituzte postontzi horiek.
Parte hartze tailerrak
Proposamenak aurkezteko beste modua, parte hartze tailerrak izango dira. Pasaia, Errenteria-Orereta, Lezo eta Oiartzunen egingo dituzte. Ekarpenak egiteko garaian berriz, hiru irizpide hartuko dituzte kontuan: eskualde osorako mesedegarria izatea; aldundiaren eskumenekoa izatea; eta ahalik eta zehatzenak izatea.
Bigarren fase batean, proposamenak lehenetsiko direla zehaztu dute arduradunek: “jasotako ekarpen zerrenda herrietan egingo diren partaidetza tailerretan eztabaidatuko da”. Bigarren faseko lehenengo partaidetza tailerra ekainaren 10ean egingo da. Ekainetik irailera bitartean, hirugarren fasean, aldundiko teknikariek lehenetsitako proposamenak aztertuko dituzte, “bideragarriak diren ala ez aztertzeko”.
Urria eta azaroa bitartean egingo dute laugarren eta azken fasea. Teknikoen oniritzia jaso duten egitasmoak eskualde bakoitzeko batzar irekietan eztabaidatuko dira eta herritarrek onartuko dute aldundiko 2015eko aurrekontuetan txaertatuko den egitasmoen zerrenda. Partaidetzazko aurrekontuak jarraitzeko edo informazioa jasotzeko web orria zabaldu du Gipuzkoako Foru Aldundiak.
Partaidetza tailerrak Oarsoaldean
- Maiatzak 5, astelehena: Pasai Antxoko Kultur Etxean, 19:00etan.
- Maiatzak 10, larunbata: Lezoko Musika Eskolan, 11:00etan.
- Maiatzak 12, astelehena: Pasai Donibaneko Victor Hugo Etxean, 19:00etan.
- Maiatzak 16, ostirala: Oiartzungo Altzibar auzoko eskola publikoan, 19:00etan.
- Maiatzak 17, larunbata: Oiartzungo udalbatzar aretoan, 10:30ean, eta Errenteria-Oreretako Xenpelar Etxean, 11:00etan.
- Maiatzak 19, astelehena: Trintxerpe-San Pedroko alkateordetzan, 19:00etan.
- Maiatzak 21, asteazkena: Errenteria-Oreretako Xenpelar Etxean, 19:00etan.
