Berdinketa lortu du Hondarribiak Getarian, Ketaren aurka
Hondarribia futbol elkarteko lehen taldeak berdinketa lortu zuen atzo Getarian (2-2), Ketaren kontra. Emaitza horrekin getariarrek matematikoki maila galdu dute, eta aurkari bat gutxiago du Hondarribiak borroka horretan. Lagun Onak ere jaitsita dago eta, hori horrela, jaitsierako beste postu bat edo bi daude jokoan.
Hiru partidaren faltan, Vasconiak eta Zarautzek 32 puntu dituzte, Bergarak 34, Hondarribiak 35, Touringek 36 eta Ostadarrek 37. Horiek dira jaitsieraren mamua erabat uxatu ez duten taldeak. Hondarribiak gutxienez garaipen bat lortu beharko luke, baina berdeak lasaiago geratuko lirateke lau puntu pilatuta, kontuan izanik atzetik dituen bi taldeekin average-a kontra duela. Hurrengo jardunaldian Antzuolak bisitatuko du Hondartza. Sailkapenaren erdialdean daude antzuolarrak, lasaitasun eremuan.
Goitik, Beriok 1-0 irabazi zion Zarautzi eta ligako txapela ziurtatu du. Heldu den urtean 3. Mailan jokatuko dute donostiarrek.
