573 tona inguru hondakin "desagertu" direla Lezotik esan du EAJk
Atez ateko hondakinen bilketa sistemak urtebete egin du Lezon, eta udalaren arabera, %85eko birziklatze tasa lortu du. Tasa hori kalkulatzerakoan, ordea, kontrolatzen ez dituen hondakinak ez dituela kontuan hartu adierazi du Lezoko EAJk. Hori hala balitz, birziklatze tasa ez litzatekeela gehienez ere %63 baino altuagoa izango esan du.
EAJk atez atekoa ezarri aurreko 11 hilabeteak sistema hori jarri ondorengo 11 hilabeterekin alderatu ditu, eta jeltzaleen arabera, hondakinen kopurua nabarmen murriztu da, %30,5 atez atekoa jarri ondorengo hilabeteetan, eta 518 tona “desagertu” direla esan du, %30. Ez du zehaztu, ordea, hondakin tona horiek non egon daitezkeen; alegia, beste herrietara eramaten den ala ez. Datu horiek San Marko mankomunitateak emandakoak direla azaldu du.
EAJk ondorioztatukoaren arabera, hamar lezoarretik hiruk ez dute udalaren hondakin zerbitzurik erabiltzen. Zentzu horretan, atez atekoa “porrota” dela esan du, eta bosgarren edukiontzia defendatu du.
Duela urtebete atez ateko sistema “inposatu” zuela udal gobernu taldeak adierazi du EAJk, eta Lezo Garbiak bildutako 2.000 sinadurei uko egin ziela.
